Rueda anima os alcaldables do PP a gañar as municipais "pero sobre todo convencer"
Por Redacción
Ata Vilaboa desprazáronse este domingo os 61 candidatos e candidatas que o Partido Popular presentará nas próximas eleccións municipais que se celebrarán o 28 de maio en todos os municipios da provincia de Pontevedra.
A todos eles, o presidente do PPdeG, Alfonso Rueda, pediulles que non dediquen "nin un minuto" a nada que non sexa traballar e dicirlle aos seus veciños o que queren facer.
"Tedes que ser os candidatos dos vosos veciños e poñer os seus intereses por enriba de todo. Hai que gañar, pero sobre todo convencer", subliñou Rueda na súa intervención neste acto, que tivo lugar na Reitoral de Cobres con Alberto Acuña, candidato en Vilaboa, como anfitrión.
A "imaxe de unidade" que, segundo o dirixente popular, transmitiu este domingo o partido, foi posible pola "xenerosidade" de todas as persoas "que deron un paso ao lado pero seguen traballando, dos que xa estiveron e decidiron volver, dos que non puideron gobernar e queren volver intentalo, e dos que asumen o reto por primeira vez".
Fronte a esta unidade, Alfonso Rueda contrapuxo un BNG "que sigue limitándose a ofrecer nacionalismo como receita para todo" e un PSdeG-PSOE "que está inmerso en liortas internas porque ninguén quere liderar o partido".
O PP renovou catro de cada dez candidaturas na provincia o que demostra, subliñou o seu presidente, que "somos un partido intelixente e xeneroso á hora de incorporar xente nova, pero tamén valoramos a experiencia e continuamos dando a nosa confianza a quen sabe facelo ben".
A formación conservadora, concluíu Rueda, presenta "aos mellores candidatos para gobernar" e que todos eles son reflexo da forma de traballar do goberno galego, "facendo as cousas con humildade, sentidiño, unidade, esforzo e dedicación".
Relacionadas:
-
O PP presenta o equipo "co que tratará de alcanzar o goberno de Vilaboa"
Por Oskar Viéitez |
-
Rajoy e Ana Pastor apadriñan a Marta Lucio como candidata do PP en Meis
Por Redacción |
-
Ángel Moldes presenta a candidatura do PP de Poio como "a única que se presenta para gañar e gobernar"
Por Redacción |
-
O PP chama ao Grove a "espertar do seu letargo" coa candidatura de Pablo Leiva
Por Redacción |