O PP chama ao Grove a "espertar do seu letargo" coa candidatura de Pablo Leiva
Por Redacción
O Partido Popular presentou este venres ao seu candidato á Alcaldía do Grove, Pablo Leiva como "unha verdadeira alternativa de Goberno", porque presenta ante os veciños "un proxecto serio, estable e moi necesario para O Grove, afastado dos populismos, dos egos e dos personalismos".
Na presentación de Pablo Leiva e do resto da candidatura tamén participaron a vicepresidenta segunda do Congreso, Ana Pastor, e o conselleiro de Cultura e Educación, Román Rodríguez.
Neste acto o presidente do Partido Popular de Pontevedra, Luis López, sinalou que "O Grove necesita e debe espertar do seu letargo. Non pode seguir perdendo oportunidades".
O líder provincial destacou que "Pablo é unha persoa con inquedanzas, formada e preparada. Teno todo para ser un magnífico alcalde" e criticou que o concello "pouco a pouco se foi perdendo a costa da inacción deste Goberno, un Goberno esgotado, que xestiona mal e por inercia e, o peor de todo, de costas aos veciños, aos colectivos…".
Tamén fixo referencia ao actual alcalde, o socialista José María Cacabelos de quen dixo "está máis cómodo en confrontar que en xestionar o seu concello".
Pola súa parte, Pablo Leiva puxo en valor que "a política local é a política da proximidade, do contacto directo coa cidadanía, da escoita activa… E durante os últimos anos os veciños do Grove non foron escoitados nin as súas demandas atendidas". Por iso, pediu apoio para garantir "un cambio de rumbo".
O candidato popular adiantou que dentro do seu programa de Goberno incluiranse a construción dun Centro de Día e ampliar o servizo de axuda no fogar, tamén proxectarán a ampliación da Escola Infantil 0-3 anos.
Por último, con respecto á candidatura, adiantou que se renova nun 75%, e que é "moi potente, preparada e comprometida"
A candidatura do PP do Grove esta conformada por: 1. Pablo Leiva Lois; 2. Alejandra Lamas Domínguez; 3. Carolina Otero Lois; 4. Santiago Mariño Couto; 5. Joaquín Agustín Prol Fontán; 6. Laura Domínguez Sineiro; 7. Ramón Piñeiro González; 8. Luis Alberto Iglesias Moldes; 9. Judith Prado Sotelo; 10. Andrea Vidal García; 11. Diego Iglesias Bravo; 12. Marta Domínguez Sineiro; 13. Miguel Ángel Devesa Otero; 14. Mª Gabriela Casal Cacabelos; 15. José Ramón Míguez Iglesias; 16. Amalia Joaquina Leiva Lois e 17. Santiago Romay Domínguez.
Como suplentes: 18. Ayelen Rodríguez Mouriño; 19. María Luz Ferreiro Cousido; 20. Francisco Fuentes Castro.