Detido por cortar cunha botella a súa parella e ameazala con dous coitelos tras a cea de Noiteboa
Por Natalia Puga
Un veciño de Pontevedra de 64 anos foi detido durante a madrugada do día de Nadal como presunto autor dun delito de violencia de xénero por agresións e ameazas á súa parella na casa que comparten nunha parroquia do rural da cidade.
A Policía Local recibiu unha alerta sobre as 1.30 horas da madrugada e desprazouse ao domicilio no que presuntamente se producira unha agresión. Ao chegar, encontrouse cunha parella no exterior e a muller dirixiuse aos axentes e explicou que era a vítima e a outra persoa que estaba no portal era o seu agresor e tiña dous coitelos cos que acababa de ameazala.
Segundo informou a Policía Local, a muller mostrou os seus brazos aos axentes e presentaba diversos cortes. Cando lle preguntaron pola orixe destes, explicou que minutos antes, logo da cea de Noiteboa, tivera unha forte discusión coa súa parella na cociña da vivenda que compartían e el a ferira.
Segundo o testemuño da muller, o home púxose moi violento e rompeu unha botella de cristal. Varios anacos de vidro quedaron sementados pola cociña, colleu un e danouna. A continuación, supostamente colleu dous coitelos e ameazouna, momento en que decidiu chamar á Policía Local.
A muller denunciou os feitos e a Policía Local entrevistouse co presunto agresor e procedeu á súa detención.