Bueu mellora a iluminación na zona de Cabo Udra
Por Redacción
O Concello de Bueu continúa coa mellora da iluminación e esta semana comezou a substitución dunha trintena de puntos de luz na zona de Cabo Udra, concretamente dende Mourisca ata Sar.
Félix Juncal, alcalde de Bueu, visitou hoxe a zona e salientou que “con esta actuación imos substituír luminarias que son antigas e ineficientes por outras de tecnoloxía LED, ademais de colocar algúns puntos novos que completan os xa existentes”.
A obra está sendo acometida pola empresa Tecnología Gallega de Mantenimiento y Servicios SL, cun importe de 38.000 euros e fináncianse con cargo ao Plan Concellos 2023 da Deputación de Pontevedra.
Así mesmo, con esta actuación agárdase que queden solucionadas as problemáticas asociadas a puntos de luz que están permanentemente acendidos.
O goberno local leva anos implementando políticas de redución do impacto medioambiental, e a substitución de luminarias en diversas zonas das tres parroquias é unha das liñas de acción, coa que se minimizan os custes enerxéticos e tamén económicos.
Precisamente, agora mesmo está aberto o prazo de licitación para que as empresas se presenten ás obras que van permitir que a senda entre Trasouto e A Portela conte con iluminación ao longo desta primavera.
Relacionadas:
-
Pontón celebra a aposta de Bueu por unha "mobilidade amable" a pesar da "inacción" da Xunta
Por Redacción |
-
A senda entre Trasouto e A Portela sumará 47 novos puntos de luz
Por Redacción |
-
Vilar e Bon estrean farois eficientes que suporán un aforro de 4.500 euros anuais
Por Redacción |
-
Bueu aforra 33.600 euros no recibo eléctrico municipal con medidas de eficiencia enerxética
Por Redacción |