Miguel Anxo Fernández Lores, alcalde de Pontevedra, con Ana Pontón, portavoz nacional do BNG

Ana Pontón asegura que a sentenza de ENCE "será recordada por inxusta e inexplicable"

Por Alejandro Espiño
Creada Martes 7 de Febreiro, 2023 e actualizada Martes 7 de Febreiro, 2023 Creada ás 16:00 do Martes 7 de Febreiro, 2023 e actualizada ás 17:55 do Martes 7 de Febreiro, 2023

A portavoz nacional do BNG, Ana Pontón, asegurou que a decisión do Tribunal Supremo sobre a fábrica de Ence en Pontevedra, avalando a súa continuidade ata o ano 2073, "será lembrada por inxusta e inexplicable".

"Sabemos que as multinacionais teñen poderes na sombra pero non pasarán por encima da dignidade de Pontevedra e de Galicia", sinalou Pontón a través das súas redes sociais.

A dirixente nacionalista avanzou que "nada nos impedirá" seguir loitando para "sacar a Ence da ría de Pontevedra", para o que prometeu que traballará a partir de hoxe "con máis forza que nunca".

Durante unha intervención no Parlamento de Galicia, Pontón avanzou que o BNG "esgotará todas as vías políticas e xudiciais" para sacar ENCE da Ría de Pontevedra e "recuperala para os seus lexítimos propietarios", os galegos e as galegas.

O seu empeño será conseguir que volva ser un ecosistema único con capacidade de xerar riqueza e miles de postos de traballo.

"Todas as cidades sacaron as súas empresas contaminantes dos centros urbanos, non se entende que se faga unha excepción con Pontevedra", alegou a líder nacionalista.