Conceden a Sanxenxo catro novos distintivos Q de Calidade para as súas praias
Por Redacción
Sanxenxo xa é o destino líder en España en Q de Calidade con 59 insignias. O Instituto para a Calidade Turística Española (ICTE), entidade certificadora deste selo, acaba de comunicar ao Concello a nova entrada de catro das súas praias: Area de Agra, Paxariñas, Bascuas e O Espiñeiro.
Este recoñecemento supervisa aspectos como as condicións hixiénicas das praias e as súas instalacións, o control dos chiringuitos, a accesibilidade, os servizos de seguridade e primeiros auxilios, a oferta de lecer e a información facilitada aos turistas, entre moitos outros. O seguinte municipio español con máis Q de Calidade é Marbella, con 43.
En total Sanxenxo conta con 16 praias, o porto deportivo Juan Carlos I, a oficina de Turismo e 41 empresas privadas certificados co selo Q de Calidade que contribúe á mellora continua dos servizos e axuda a diferenciarse dentro do sector turístico. Sanxenxo foi o primeiro municipio en contar con este distintivo recoñecido internacionalmente nunha oficina de Turismo municipal e a aposta decidida por este selo fixo que se pasase de 36 en 2017 a 59 en 2022.
Sanxenxo tamén é líder en España en bandeiras azuis cun total de 17 en praias e 4 insignias máis no Real Club Náutico de Sanxenxo, o Real Club Náutico de Portonovo, o porto deportivo municipal Juan Carlos I e o centro azul da Telleira. Ademais, o municipio sumou este ano un novo sendeiro azul, o de Aldariz, converténdose no municipio español con máis carreiros azuis en España, con máis de 24 quilómetros e 7 roteiros.
Relacionadas:
-
Seis iniciativas privadas planean construír cabanas de madeira para uso turístico en Cerdedo-Cotobade
Por Oskar Viéitez |
-
Un outubro con 66.912 pernoitas en Sanxenxo, máis que antes da pandemia
Por Redacción |
-
Incremento do 21,6% en gasto social no orzamento de 39 millóns de euros para 2023 en Sanxenxo
Por Redacción | Creada e actualizada
-
Sanxenxo promociónase como destino na World Travel Market de Londres
Por Redacción |