Ampliado o punto limpo do Parque empresarial da Facha en Campo Lameiro
Por Redacción
Luís López, delegado territorial da Xunta de Galicia en Pontevedra, e o alcalde de Campo Lameiro, Carlos Costa, achegábanse este martes ata o Polígono empresarial da Facha para comprobar a intervención ambiental no punto limpo de recollida de residuos.
A obra supuxo un investimento, a través de Vicepresidencia primeira e Consellería de Economía, Industria e Innovación, de 33.000 euros. Os traballos centráronse en aumentar a nave existente con materiais de seguridade para permitir que as industrias poidan almacenar, clasificar e tamén depositar neste espazo os seus residuos antes de que sexan trasladados ata os xestores autorizados para o seu tratamento.
Esta acción forma parte da iniciativa Concellos Emprendedores, na que se atopa o Concello de Campo Lameiro. Segundo explica Luís López, o obxectivo desta proposta é captar investimentos empresariais e fomentar o asentamento de industrias, a través do apoio da administración con estas melloras.