Sanxenxo saca a licitación o alugueiro de dúas naves como almacén para distintos servizos municipais
Por Redacción
A falta de inmobles que reúnan as condicións para esta función empuxou ao Concello de Sanxenxo a sacar a concurso o alugueiro de dúas naves como almacén para distintos servizos municipais. O orzamento de base de licitación por un ano ascende a 38.400 euros con posibilidade de 3 prórrogas.
En canto ás características, unha das naves debe ter unha superficie mínima de almacenamento de 700 metros cadrados na que se poidan almacenar e gardar tractores, módulos de aseos, maquinaria e elementos de dimensións considerables. A nave de contar ademais cunha entrada e saída de vehículos segura e cómoda, fronte á vía pública. Ademais, debe dispoñer de servizos de electricidade, iluminación e fontanería.
A outra nave contará cunha superficie mínima de 500 metros cadrados e deberá cumprir cos requisitos da anterior.
No prego exponse que se valorará que o local estea acondicionado ou con obras mínimas de adecuación para o cumprimento de normativa que se pretende sobre aqueloutros que precisen obras de acondicionamento total.
O proceso de contratación atópase nestes momentos en proceso de valoración da única oferta que se presentou.
NAVE MULTISERVICIOS
A empresa municipal Insua Sanxenxo acaba de adxudicar a redacción do proxecto para a construción dun complexo que integrará diferentes naves destinadas a servizos municipais no parque empresarial de Nantes. Con esta construción, o Concello espera aforrar o actual alugueiro da nave de Servizos. Ademais, a obra permitirá concentrar nun mesmo espazo varios servizos municipais.
O anteproxecto contempla a construción de cinco edificacións ou naves destinadas á Policía Local, Emerxencias e unha nave para servizos xerais e espazo coworking ou viveiro de empresas.
Ademais, contémplase unha oficina para servizos xerais e unha estación para almacenamento da iluminación pública, nunha parcela que conta cunha superficie total de 8.343 metros cadrados. O orzamento de 2023 ten reservada unha partida de 1,5 millóns para a súa construción.
Relacionadas:
-
O complexo de servizos municipais en Nantes sae a concurso por 2,6 millóns de euros
Por Redacción |
-
A Policía Local de Sanxenxo tramitou 2.603 denuncias de tráfico durante este ano
Por Redacción |
-
O servizo de Emerxencias de Sanxenxo realizou 854 intervencións no que vai de ano
Por Redacción |
-
Primeiros pasos na tramitación do complexo municipal de servizos previsto no parque empresarial de Nantes
Por Redacción |