Cun ton "construtivo" e coa intención de ambas as partes de "chegar a acordos". Así transcorreu, segundo destacaron ambos, a primeira reunión institucional entre o presidente da Xunta, Alfonso Rueda, e o alcalde de Pontevedra, Miguel Anxo Fernández Lores.

"Foi un encontro sen présas, con calma e con respecto ao posicionamento de cada un", subliñou Fernández Lores. Rueda, pola súa banda, destacou que "esta é e segue sendo a miña cidade", polo que celebra que Xunta e Concello manteñan unha colaboración continua.

Santa Clara, un dos temas estrela da axenda municipal, foi un dos acordos que pecharon ambos os dirixentes. O goberno galego avanza que colaborará economicamente coa rehabilitación do convento, que será o sétimo edificio do Museo de Pontevedra.

A Xunta, segundo afirmou o seu presidente, "non se quere quedar fóra de Santa Clara".

Así, Alfonso Rueda asegurou que o executivo autonómico comprométese a participar no seu financiamento. A cantidade concreta definirase, sostivo, cando estea definido o proxecto de rehabilitación. "Participaremos no que se queira facer", reiterou.

Para o alcalde, o acordo sobre Santa Clara "é moi importante" e supón que a Xunta contribúa a reforzar o que é o "maior museo de Galicia". A incorporación do vello convento permitirá poñer en valor todo o patrimonio arqueolóxico da provincia.

A rehabilitación do antigo cenobio quedará definida por un concurso internacional de ideas que a Deputación convocará, previsiblemente antes de final de ano, para escoller a proposta máis adecuada para afrontar a custosa rehabilitación do convento.

Pantalla completa