Agardan que as obras da senda peonil na PO-313 entre Pardavila e Cadro conclúan neste 2022
Por Redacción
Luís López e María Ramallo, delegado territorial da Xunta e alcaldesa de Marín, visitaban este mércores a zona de obras da senda peonil de 800 metros de lonxitude que se estende na estrada autonómica PO-313 no tramo entre Pardavila e Cadro.
Estes traballos, iniciados en abril, realízanse cun investimento de 611.849 euros e a previsión da Xunta é que se atopen finalizados antes de que conclúa este 2022. A obra desenvólvese entre Marín e Moaña dentro do Plan de Sendas do Morrazo co obxectivo de fomentar a mobilidade sostible e a seguridade viaria.
Este itinerario execútase pola marxe esquerda con formigón e presenta un ancho variable, dependendo do espazo existente en cada punto. O mínimo, en todo caso, é de 1,8 metros ao longo de todo o traxecto.
Está previsto que se traslade lixeiramente un cruceiro que se atopa na marxe esquerda da estrada ata unha zona próxima para garantir o ancho mínimo da senda. Tamén se derrubarán edificacións en estado ruinoso e non habitadas, segundo explica a Xunta, para acondicionar unha pequena praza, que contará con nova iluminación e bancos.
O proxecto dá continuidade á senda que se inicia á saída da travesía de Marín e chega a Pardavila, unha vez pasado a ligazón coa Variante de Marín. Unha vez finalizado o itinerario será de case tres quilómetros nesta estrada entre Coirados e Cadro.
Relacionadas:
-
Ethel Vázquez supervisa o remate da obra da senda peonil entre Coirados e Cadro
Por Oskar Viéitez |
-
Comezan as obras da nova senda na estrada PO-313 entre Pardavila e Cadro
Por Redacción |
-
As obras da senda peonil entre Pardavila e Cadro comezarán na primavera
Por Redacción |
-
Trece empresas ofrécense para executar unha senda na PO-313 entre Pardavila e Cadro
Por Redacción |