Noventa mil euros para converter o Forno da Cal nun novo activo turístico para Vilaboa
Por Redacción
Ata 90.000 euros vai a investir o Concello de Vilaboa nunha actuación que permitirá converter o Forno da Cal nun novo activo turístico do municipio e conectalo co peirao de Cobres.
Será a empresa Naturgalia a que rehabilitará toda a estrutura e executará a maiores o acondicionamento do entorno exterior para recuperar todo o seu ámbito arquitectónico.
O Forno da Cal está situado nun terreo propiedade da empresa Pescapuerta, que colabora co Concello para desenvolver esta iniciativa cedendo o uso e os terreos para facer o proxecto.
Ademais, o goberno municipal asinou tamén un acordo coa comunidade de montes de San Adrián para a cesión dos terreos lindeiros, que permitirán o acondicionamento da zona que vai desde a Ponte de Rande ata a Punta de Atravesada.
En San Adrián e Santa Cristina de Cobres, parroquias onde residían boa parte dos traballadores e traballadoras deste forno que se mantivo activo ata a década dos anos 60, quedan aínda moitas testemuñas vivas dun oficio moi duro.
Esta singularidade foi obxecto dun traballo desenvolvido por profesorado e alumnado do colexio do Toural e da Asociación de Mulleres de Vilaboa.
Xunto coa recuperación do forno, o proxecto do Concello inclúe a instalación duns paneis informativos que divulguen a actividade industrial dun forno con certas particularidades.
Entre elas, destaca o feito de que a mercancía para facer a cal chegaba por mar. Facían unha produción intensa destinada sobre todo á construción, xa que o encalado das vivendas era o xeito máis común de sanealas e protexelas da entrada de insectos durante o século XX.
Relacionadas:
-
O Forno do Cal recobra a vida perdida da man das familias dos antiguos traballadores
Por Redacción |
-
O Forno do Cal de Vilaboa recupera o seu esplendor tras concluír as obras de rehabilitación
Por Redacción |
-
A rehabilitación do Forno do Cal converte este patrimonio industrial nun novo atractivo turístico para Vilaboa
Por Oskar Viéitez |
-
O Forno da Cal recibirá unha subvención para rehabilitarse e ser activo turístico
Por Redacción |
-
Vilaboa proponlle a Costas un paseo litoral entre as Salinas e o Forno da Cal
Por Redacción |