Os amantes da gastronomía, a música e a cultura cervexeira deben marcar en vermello unha data no calendario: 16, 17 e 18 de setembro. A Alameda de Pontevedra acollerá a primeira edición de FERVE Estrella Galicia, un evento que segundo os seus organizadores quere "reinventar a romaría galega".

FERVE, que se presentou este xoves no palco da Alameda, "é unha festa máis que un festival, unha experiencia máis que un evento", segundo destacou Laura Fontán, responsable de Esmerarte, a compañía que impulsa esta iniciativa que será anual e itinerante.

"Para amosar todo o que temos só unha edición non é posible", engadiu Fontán, que estivo acompañada de Goretti Castro, representante de Hijos de Rivera; Luís López, delegado da Xunta en Pontevedra; e Iván Puentes, concelleiro de Desenvolvemento Sostible en Pontevedra.

Pontevedra, que opta a converterse na Capital Española da Gastronomía en 2023, "era a mellor opción para acoller un proxecto destas características", sinalaron, unha festa que nace cun formato "innovador, aberto e desenfadado" pero comprometido coa gastronomía.

Así, segundo os seus responsables, busca "desmarcarse" dos eventos culinarios "convencionais", achegando un enfoque "atractivo e algo provocador", poñendo en valor o talento e o produto da cociña galega, sempre coa mirada posta nas súas orixes: "a comida da casa".

A "espiña dorsal" de FERVE será a degustación dos petiscos de autor. 

Os anfitrións do evento serán os pontevedreses Iñaki Bretal, Pepe Solla, Pepe Vieira e Javier Olleros. Ambos estarán á fronte dun 'equipo' de cociñeiros composto por representantes da cociña galega, nacional e internacional, que deleitarán aos padais do público.

Participarán nesta festa gastronómica Diego Guerrero, Vicky Sevilla, Ignacio Echapresto, Héctor López, Iván Domínguez ou Xanty Elías, entre outros. O punto internacional poñerano o brasileiro Juliano Valese e o panameño Mario Castrellón.

A vertente musical, pola súa banda, correrá a cargo de Baiuca, Xoel López, Marilia Monzón e a banda de Late Motiv, con Pablo Novoa á fronte. Haberá máis actuacións e sorpresas que se irán confirmando ao longo das próximas semanas.

FERVE comezará a tarde do venres 16 de setembro cunha degustación especial e o concerto de Baiuca, mentres que entre o sábado e o domingo poderanse probar os petiscos elaborados polos chefs invitados, acompañados das cervexas de Estrela Galicia.

A banda de Late Motiv e Marilia Monzón actuarán o sábado ao mediodía e o de Xoel López, terá lugar o domingo pola mañá. 

De maneira paralela, organizaranse as FERVE Talks, unhas charlas sobre gastronomía, ás que se sumarán showcookings con Iñaki Bretal e Hector López ou talleres relacionados coa cervexa.

Ademais, durante toda a fin de semana, instalarase na Alameda de Pontevedra un mercado de artesanía, que organizará Artesanía de Galicia, e outro de produtos sostibles, que estará a cargo do Mercado de la Cosecha, un proxecto da compañía produtora de Estrela Galicia.

O acceso a FERVE será libre e os prezos dos petiscos de autor e das consumicións serán populares. Tamén a asistencia a concertos e charlas será gratuíta, así como a asistencia a talleres e showcookings, previa preinscrición ata completar prazas.