O GPS xogoulle unha mala pasada a dúas turistas estranxeiras que chegaron este martes a Combarro. O seu coche quedou atascado en pleno centro histórico da vila.

O vehículo chegou ata as inmediacións da igrexa de San Roque, un lugar de difícil acceso debido á estreiteza da rúa.

Foi sobre as 20:40 horas da tarde, segundo informa a Policía Local de Poio.

As dúas mulleres non coñecían a zona e querían visitar Combarro.

A pesar dos sinais que prohiben o paso dos vehículos e do acceso complicado ata a zona, seguiron conducindo ata que quedaron atrapadas.

Coa axuda dun guindastre e diversas e complexas manobras, os servizos de emerxencia lograron auxilialas e retirar o coche da complicada situación na que se meteron.