Vendidos xa medio milleiro de tíckets para a Festa do Codillo deste domingo
Por Redacción
As oficinas municipais do Concello da Lama venderon xa anticipadamente medio milleiro de tíckets para participar no xantar da Festa do Codillo que se celebrará durante a xornada deste domingo 22 de maio na Alameda do municipio.
Este venres finaliza o prazo para adquirir eses vales anticipados que permiten saborear o prato de codillo estofado con guarnición de patacas asadas, chícharos e cenorias. En todo caso, as persoas que desexen participa do evento gastronómico terán a oportunidade de adquirir os billetes durante o domingo no recinto da festa.
Ademais do prato típico, o público con ticket terá dereito a bebida, un anaco de pan, cubertos e un prato de barro conmemorativo desta cita.
Ás 13.30 horas dese día abrirase a caseta de servizo de racións do codillo. A intención desde a organización é axilizar a repartición e evitar aglomeracións de comensais. A caseta ofrecerá racións ata as 15 horas ou ata esgotar existencias.
Despois do parón obrigado pola pandemia, o Concello da Lama quere converter este acto na festa máis "popular posible" e, desta forma, o prezo habitual dos tíckets de 12 euros rebáixase a 10 euros, malia o aumento do IPC e do custo da vida. A idea do goberno local é, segundo o tenente de alcalde David Carrera, que se achegue o maior número de visitantes e de residentes no municipio a esta xornada gastronómica e popular.
A Festa do Codillo, que chega á súa vixésima edición, será amenizada pola Banda de Música Municipal da Lama e a Charanga Os Encerellados, que ofrecerán diversión e alegría durante todo o domingo.
Ao mesmo tempo, celebrarase unha Mostra de Produtos da Terra. Alí, o público poderá adquirir queixo, repostería típica, produtos da horta ecolóxica ou mel, entre outros. Tamén se instalará un posto de venda de polbo como é tradicional nas romarías de Galicia.
Relacionadas:
-
Dispositivo especial de limpeza e seguridade na Lama pola romaría do Santo Cristo de Xende
Por Redacción |
-
Éxito rotundo da Festa do Codillo, que esgotou as racións a pesar do mal tempo
Por Redacción |
-
O codillo estofado con guarnición será o protagonista da XX edición da festa da Lama
Por Redacción |
-
Volven as festas gastronómicas á Lama e chegan con rebaixas: o codillo pasa de 12 a 10 euros
Por Redacción |