Máis dun lustro de atraso no cambio de cuberta do Froebel mentres as pingueiras seguen a encher caldeiros no colexio
Por Anxo Lourido & Mónica Patxot
Unha estampa terceiromundista. Caldeiros, esportas e cubos espallados recollendo auga, papeis de xornal absorbendo o líquido que se filtra polos corredores, conos alertando aos estudantes do perigo de escorregar que supón pisar polas zonas húmidas. A escena repítese, cada vez que chove, desde hai máis dunha década no CEIP Plurilingüe Froebel, un dos colexios referentes da cidade de Pontevedra.
O tema é de tal gravidade que chegou ao Parlamento de Galicia, á comisión de Educación e Cultura. Alí, o grupo socialista preguntaba ao goberno autonómico pola situación deste centro escolar. No ano 2010, un informe técnico xa xustificaba a necesidade das obras no centro. Aprobouse para acometer un proxecto de reforma en tres fases.
Duas delas executáronse, pero a última, a máis custosa, orzada inicialmente en preto de 800.000 euros, permanece paralizada. Esta fase conleva a substitución da cuberta do patio interior, utilizado tamén como ximnasio, que se atopa deteriorado polo paso dos anos e, en consecuencia, rexistra filtracións de auga durante todos os invernos co consecuente problema para o alumnado e o profesorado do centro.
Manuel Vila, secretario xeral técnico da Consellería de Educación, explicaba durante a comisión que o Froebel é un centro singular, con máis de 85 anos de historia, cunhas instalacións de valor histórico e cultural "notable", circunstancias que condicionan as solucións construtivas, alegou para acometer as reformas no inmoble. Recoñeceu que aínda queda por abordar a terceira fase prevista para o ano 2018 e que contempla doce actuacións, entre as que se atopa o complexo cambio de cuberta.
Xustificou o atraso nas complicacións que conleva recolocar durante todo un curso escolar ao alumnado de primaria, un procedemento necesario ante as complicacións que presenta a intervención. A esta cuestión engadiu que a irrupción da pandemia en 2020 provocou unha reconsideración dos espazos educativos nos centros de ensino e, por este motivo, as actuacións deste tipo quedaron en suspenso.
RECOLOCACIÓN DO ALUMNADO DURANTE UN ANO ESCOLAR
Indicou tamén que a Consellería de Educación ten previsto retomar o proxecto desa Fase C no Froebel pero, engadiu, será necesario reformular a proposta inicial porque se incrementaron os prezos no sector da construción e, por tanto, esta obra orzamentada en 800.000 euros pasaría a máis de 1,2 millóns, segundo expuxo en sede parlamentaria.
Advertiu tamén que están previstas outras obras en centros educativos de Pontevedra como o IES Valle Inclán, con outra recolocación temporal do alumnado. Por este motivo, alegou que desde a Xunta de Galicia están "dispostos" a acometer a reforma do Froebel pero precisan de tempo para revisar o proxecto e planificar a reorganización da comunidade escolar.
A deputada socialista Noelia Otero, en representación da pontevedresa Paloma Castro, que se atopaba ausente por enfermidade, lembrou ao representante da Consellería de Educación que no centro "chove desde hai moitos anos" e reclamou unha aceleración destes procesos para que o alumnado poida "acudir a clase nunhas mínimas condicións de salubridade".
"Pedimos que se comprometan e que o fagan con prioridade. Non poden agardar máis, nin a ANPA, nin a comunidad educativa nin o alumnado", expuxo Otero, reclamando unha data para o inicio das obras.
Pola súa banda, na quenda de réplica, Manuel Vila insistiu en que están a estudar o proxecto e que se licitarán as obras atendendo á dificultade e características do edificio e á necesidade dunha "actuación sensible", lembrando as dificultades de trasladar ao alumnado a outro espazo.
Evitou dar datas concretas para esta reforma alegando que "a concreción dependerá de dispoñer desa concreción de reevaluación", que supoñerá un incremento económico forte sobre a estimación inicial. Tamén atacou o Concello de Pontevedra por non contestar á petición realizada desde Educación para que ceda os espazos dos que dispón nese edificio para ampliar a biblioteca do centro. "Todos teñen que remar na mesma dirección", apuntou.
A ANPA, CANSA DE PROMESAS
Cando Xandra Revenga, actual presidenta do ANPA do Froebel matriculou ao seu fillo no centro escolar no ano 2015, as pingueiras no colexio xa formaban parte do día a día das reclamacións de pais e nais. Desde que asumiu o cargo todos os anos piden cita á Consellería de Educación para que algún responsable ofreza unha explicación sobre este problema que se eterniza. Enviaron correos electrónicos, ingresaron peticións de reunións por rexistro e todos os cursos reciben a calada por resposta.
"Durante unha tempada a auga entraba por todos os lados e varios nenos caeron polas escaleiras. Foron caídas parvas, pero puido chegar a producirse unha fastidiada. Os nenos entran e saen e van correndo, coa posibilidade de escorregar e levar leñazos bos", indica Xandra Revenga.
"Levamos oíndo a intención de facer a obra desde hai moito tempo", afirma cansada de tantas promesas incumpridas e teme que, cando finalice os seus estudos o seu fillo, o centro continúe na mesma situación: "quedan dous anos e as obras seguirán sen facerse". Ás dúas presidentas anteriores os responsables de Educación da Xunta de Galicia xa lles prometeran que a cuberta se substituiría antes de que os seus fillos saísen do centro. Unha promesa incumprida.
As pingueiras provocan, ademais, danos no material: "na ANPA investimos en vinilos con xogos para o chan e están encharcados cada vez que chove e dános a sensación de que estamos a tirar o diñeiro", laméntase Revenga indicando que, polo momento, non desenvolveron unha campaña de protestas porque "non queremos saltarnos a legalidade. Queriamos saber que pasaba". Recoñece que a paciencia se esgota e queren ver os movementos por parte da Consellería cara ao vindeiro curso: "como ANPA queremos que haxa respaldo masivo se facemos unha protesta".
Xandra Revenga é comprensiva coas complicacións que conleva un operativo de recolocación de todo o alumnado de Primaria, ao redor de 250 estudantes, que terá tamén consecuencias nas familias; pero considera que a obra é necesaria nun centro que non está a ser ben atendido polas administracións.
"O problema das competencias é moi caótico. Suponse que o mantemento é do Concello e as grandes obras pertencen á Xunta, pero chega o momento e ningún as realiza", explica. Pide por este motivo á concellería de Educación de Pontevedra que limpe o tellado para tentar reducir así a caída de auga no interior do centro: "a cuberta non está verde senón o seguinte e xa debemos de ter alí de todo. Se non hai mantemento tamén se vai estragando máis o material e é peor aínda", protesta.
Este curso xa se atopa na súa fase final e o bo tempo parece escondelo todo, pero desde a asociación de pais e nais piden solucións antes de que chegue setembro e os caldeiros volvan invadir a zona de xogos e os corredores do centro escolar.
Relacionadas:
-
É unha piscina? Non, é unha nova inundación no patio interior do colexio Froebel tras as fortes chuvias
Por Anxo Lourido |
-
A Xunta revisará o proxecto da reforma do colexio Froebel para acometer unha rehabilitación maior da prevista
Por Oskar Viéitez |
-
Nova petición para que a Xunta resolva os problemas de pingueiras no CEIP Froebel
Por Anxo Lourido |
-
O IES Valle Inclán celebra o Día de Europa
Por Redacción |
-
Adxudicado o contrato para as obras de mantemento nos 22 colexios de Pontevedra
Por Redacción |
-
O Arquivo municipal deixa a Casa Consistorial para trasladarse a Casa da Luz
Por Redacción |
-
Adxudican as obras para as reformas do colexio Froebel e A Xunqueira II
Por Redacción |
-
Educación anuncia actuacións urxentes no colexio Froebel
Por Oskar Viéitez |