O Consello Regulador da Denominación de Orixe Rías Baixas e a Cámara de Comercio, Industria e Servizos de Pontevedra, Vigo e Vilagarcía asinaron este luns un convenio para o desenvolvemento de seis acciones de internacionalización financiadas con fondos europeos e con orzamento total que ascende 117.720 euros.

Este convenio permitirá ás adegas acceder ao cofinanciamento ofrecido por FEDER, que alcanza un 80% dos gastos de viaxe para que poidan participar nunha misión inversa de empresarios e distribuidores de países europeos; unha misión directa a Europa e a promoción en catro espazos para expoñer os seus produtos en Cancún, Riviera Maya, Londres e República Dominicana. Estas actividades desenvolveranse ao longo deste ano.

O presidente do Consello Regulador, Juan Gil de Araujo, agradeceu este acordo á Cámara polo feito de que "ampliasen o seu apoio a outras actividades promocionais no exterior porque é fundamental para o noso sector, cuxas cifras de exportación non pairan de crecer".

Pola súa banda, José García Costas destacou que a cámara que preside "seguirá apostando con todos os seus recursos por impulsar a internacionalización das nosas empresas".

Este acordo reedita outros asinados en exercicios anteriores e completa outras accións realizadas conxuntamente co Consello Regulador no seo do Plan de Fomento das Exportacións Galegas (FOEXGA), cofinanciado polo Instituto Galego de Promoción Económica (IGAPE).