Nin a falta de materiais frustra o bo ritmo da obra nova en Pontevedra: crece un 13,5% no principio de 2022
Por Redacción
A construción de vivenda de obra nova e rehabilitación continúa a bo ritmo Pontevedra e a súa área de influencia a pesar da actual conxuntura económica internacional e a situacións que poderían influír de forma directa na súa actividade como a falta de materiais ou os problemas para conseguir man de obra dos que falan algúns empresarios.
Así, segundo os datos da Delegación de Pontevedra do Colexio Oficial da Arquitectura Técnica de Pontevedra ( Coatpo), os Expedientes de Dirección de Obras tramitados no primeiro trimestre de 2022 creceron un 13,50% respecto ao mesmo período do ano anterior. De 200 expedientes en 2021 pasouse a 227 en 2022.
Segundo estes datos, o 37% dos expedientes corresponden a obra nova (84) e o 63% son rehabilitacións e reformas (143). No primeiro trimestre de 2022 as novas promocións de vivendas creceron un 18,30% e pasaron de 71 expedientes de dirección de obra de xaneiro a marzo de 2021 aos 84 expedientes tramitados nos tres primeiros meses deste exercicio, segundo datos da Oficina Técnica do Colexio Oficial da Arquitectura Técnica de Pontevedra, con sedes nas cidades de Vigo e Pontevedra.
As rehabilitacións e reformas creceron un 10,85%. No primeiro trimestre de 2021 tramitáronse 129 fronte aos 143 de 2022.
O presidente dos aparelladores de Pontevedra, Manuel Rañó, asegura que perciben que "o sector está a crecer con forza" e a obra nova e a rehabilitación de vivenda en toda a provincia está a revelarse como un dos motores da recuperación.
Así, cre que a actividade vive un momento de "vitalidade e fortaleza" a pesar dos "nuboeiros que xa temos aquí" como o encarecemento da enerxía e os combustibles, a carencia de materias primas básicas para a construción e a falta de man de obra cualificada, así como os problemas de loxística e transporte.
De fronte ao futuro, confían en manter o ritmo de crecemento do primeiro trimestre tanto nos expedientes de obra nova como nas rehabilitacións, en especial pola chegada a partir dos próximos meses dos Fondos Next Generation da Unión Europa, que "axudarán a manter a fortaleza dun sector estratéxico para a economía galega".
A situación actual tamén se nota nos orzamentos das obras. O Orzamento de Execución Material (PEM), que reflicte desde o inicio do proxecto todos os custos que implica unha obra incluíndo materiais, creceu un 80,6% no primeiro trimestre de 2022. Pasou dos 23,81 millóns de euros de xaneiro a marzo de 2021 (119.099 euros por cada obra) aos 43 millóns dos tres primeiros meses deste exercicio (189.433 euros por proxecto), segundo datos da Oficina Técnica do Colexio da Arquitectura Técnica de Pontevedra.
O Colexio Oficial da Arquitectura Técnica de Pontevedra solicita ás Administracións públicas a posta en marcha de accións que favorezan a contención dos prezos da enerxía e os combustibles, para así asegurar o abastecemento de materiais na construción e a contención do custo nas obras.
Relacionadas:
-
Chega a Pontevedra o "Plan Marshall" da rehabilitación enerxética de vivendas e edificios
Por Redacción |
-
A arquitecta técnica pontevedresa Juana Méndez Modia, galardoada como 'Profesional Colexiada de 2021'
Por Redacción |
-
A aparelladora cuntiense, Ana Castro, premiada polo seu traballo na Catedral de Santiago
Por Oskar Viéitez |