O mellor tirador de cervexa de España está en Ribadumia
Por Alejandro Espiño
Gustavo Rey, da Cervexaría O Encontro de Ribadumia, proclamouse este martes como o mellor tirador de cervexa de España. Fíxoo no marco do Salón de Gourmets de Madrid, que acolleu a final do Campionato Nacional Estrella Galicia de Tirada de Cervexa. Doce hostaleiros de diferentes puntos de España competiron por alzarse con este título.
O gañador, que gañara previamente o certame galego, manifestou a súa enorme alegría por este triunfo, que lle reporta un premio de 1.000 euros, e confesou que "houbo moita tensión e todos cometemos fallos".
Ao remate do campionato, engadiu que "xa noto que vén xente ao meu local preguntando polas mellores cañas así que este premio seguro que ten aínda máis repercusión".
A calidade, eficacia e rapidez no servizo, así como os coñecementos dos aspirantes ao título sobre as características dos produtos Estrella Galicia son as calidades que deron o título ao mellor tirador profesional de cervexa de España
Este campionato trata de recoñecer a destreza e calidade no servizo de cervexa dos profesionais da hostalería como un factor crave para gozar da mellor cervexa.
Os aspirantes tiveron que demostrar aos expertos do xurado a súa eficacia tirando cañas, servindo cervexa de botella, servizo de bandexa e coñecemento e cultura sobre o mundo cervexeiro nun tempo limitado.
Integrado por expertos en tirada, hostalería e gastronomía, o papel do xurado foi o de valorar a calidade, eficacia e rapidez no servizo, así como os coñecementos sobre cultura cervexeira dos aspirantes ao título.
Ademais, analizou a actividade de cada participante, tendo en cuenta uns parámetros como o estilo, técnica e forma de tirar a cervexa, o acabado, a cremosidade da escuma e limpeza, así como a súa presentación.