Tras varios meses de combater contra a enfermidade que lle afectaba, na tarde deste xoves falecía en Pontevedra José Ángel Fernández Arruti, á idade de 91 anos.

Fernández Arruti era o fillo primoxénito do matrimonio formado por Josefina Arruti Viaño e o exiliado e represaliado político republicano Bibiano Fernández Osorio-Tafall, alcalde de Pontevedra durante a República e un dos galegos de maior relevancia internacional do pasado século XX. Licenciouse en Dereito en 1952 pola Universidade de Santiago de Compostela, ampliando despois os seus estudos en Roma, onde realizou unha tese sobre a Cidade do Vaticano.

Foi catedrático de dereito canónico na Universidade de Santiago de Compostela ata a súa xubilación no ano 2002.

Tamén presidiu a Confraría da Divina Peregrina de Pontevedra ata o ano 2004, pero sen dúbida, entre a súa intensa actividade profesional e cidadá, a súa faceta máis coñecida chegoulle por presidir o Liceo Casino de Pontevedra durante 21 anos, entre 1985 e 2006, cando foi derrotado nunhas axustadas eleccións por Eduardo Barros. 

Arruti, viúvo de Enriqueta López Álvarez e pai de catro fillos, está a ser velado no tanatorio Pontevedra e será enterrado este venres 22 de abril no cemiterio municipal de San Amaro. 

Este venres sairá do tanatorio para o seu enterro ás 18.30 horas e a familia organizou un funeral para o sábado 23 ás 12.30 horas da mañá na Real Basílica de Santa María.