A vella ponte do ferrocarril sobre o Lérez reabrirá este ano convertida en senda peonil e ciclista
Por Alejandro Espiño
O primeiro paso da futura vía verde entre Pontevedra e Vilagarcía darase este mesmo ano. Antes de que termine 2022, a vella ponte do ferrocarril sobre o río Lérez, nas inmediacións da praia fluvial, quedará convertido nunha senda peonil e ciclista.
Esta actuación, na que se investirán 200.000 euros, será financiada a través dos fondos europeos EDUSI. Unha vez se complete o proceso de licitación, que o goberno municipal puxo en marcha este luns, as obras durarán catro meses.
"Ao longo deste ano a obra estará rematada e poderá ser gozada por todos os pontevedreses", asegurou o edil de Desenvolvemento Sostible, Iván Puentes, que destacou que esta será a infraestrutura "máis singular" de todo o trazado da vía verde.
O proxecto contempla un tratamento de formigón sobre o pavimento da ponte que substituirá á pedra que sustenta as vías actuais. Ademais, cambiarase a varanda por motivos de seguridade e conectarase a ponte coa praia fluvial e a senda do Lérez.
Para esta última cuestión exponse unha dobre solución. Por unha banda, unha senda accesible en zigzag, reforzada con muros de cachotería para sortear os desniveis; e, por outro, cunha escaleira de madeira entre a cafetería da praia e a ponte do ferrocarril.
A oferta económica que presenten as empresas interesadas en executar estes traballos supoñerá o 70% da valoración técnica que outorgue a mesa de contratación, mentres que o 30% restante sairá das melloras propostas polo Concello.
Así, vinte puntos adicionais recibirán as compañías que asuman, con cargo ao montante global do contrato, o tratamento vexetal de todo o noiro próximo á vella ponte, rozando a zona e plantando diferentes especies arbustivas.
Terán outros dez puntos, cinco por cada unha, se instalan peches ou valos nos muros que se habiliten na senda e se executan un tapiado provisional na boca do túnel, para embelecer a contorna ata saber se a futura conexión cara a Vilagarcía pode pasar por el.
A esta actuación sumaránselle, dentro doutros proxectos que recibiron financiamento europeo, a construción dunha senda que de saída á ponte cara a ambas as marxes da senda fluvial e o reacondicionamento dos coñecidos como salóns do Lérez.
Relacionadas:
-
Abre o novo miradoiro sobre o Lérez tras acondicionar a antiga ponte do tren
Por Alejandro Espiño & Mónica Patxot |
-
Estiman que esta primavera a antiga ponte do ferrocarril será un "balcón fermoso" sobre o Lérez
Por Redacción |
-
Pontevedra recibe un millón de euros de Europa para rexenerar as ribeiras do Lérez
Por Manu Otero |
-
Pontevedra priorizará a construción dunha vía verde ata Barro cos fondos Next Generation para o turismo
Por Manu Otero |
-
Pontevedra proporá unir a senda Vilagarcía-Portas coa futura vía verde ata Arcade
Por Redacción |