O alcalde de Sanxenxo, Telmo Martín, mantivo este xoves un encontro co presidente do Consorcio de Empresas Turísticas (CETS), Alfonso Martínez, e a presidenta da Asociación de Vivendas Turísticas de Galicia (AVITURGA), Dulcinea Aguín, para abordar as perspectivas para a tempada alta.

O sector hostaleiro que abrirá ao 80% esta semana Santa presenta un bo nivel de ocupación. Martínez indica que as cifras oscilan entre o 60 e 75%, pero confía en que as posibles reservas de última hora cheguen a incrementar estes números. 
Aguín eleva a ocupación de vivendas de uso turístico dispoñibles en Semana Santa en Sanxenxo ao 80% e destaca o "alto nivel de reservas anticipadas" para o verán.

O Concello de Sanxenxo reforzará como xa é habitual a seguridade e o control de tráfico coa Policía Local e a limpeza dos espazos públicos nos que hai xa semanas realizouse un operativo integral de higienización nos centros urbanos de Sanxenxo, Portonovo, Vilalonga e A Revolta. 

O alcalde expresoulles o seu compromiso de poñer todos os esforzos necesarios para reforzar a limpeza, o coidado e o mantemento de praias e a seguridade cidadá de forma que se faga compatible o lecer nocturno e o descanso das familias.

O alcalde, Telmo Martín, incidiu en que "o verán pasado Sanxenxo quedouse moi cerca do mellor ano turístico, 2019. Este ano o noso obxectivo é mellorar o 2019 e tanto o sector como o goberno sabemos que a mellor ferramenta é a calidade do servizo".

Cada tempada o Concello de Sanxenxo inviste máis dun millón de euros na posta a punto da tempada alta e a mellora dos servizos. Proba diso é o mantemento un ano máis da limpeza cada hora e media dos baños das praias ou o incremento de praias co servizo anticipado de socorristas en xuño.