Nantes reforza o seu catálogo empresarial coa chegada de Eurotec
Por Redacción
Unha nova firma de I+D+i súmase á oferta do parque empresarial de Nantes. Trátase de Eurotec Inspección S.L., dedicada a realizar probas de calidade en obras civís e en edificación, así como inspeccións de parques Infantís, áreas deportivas e equipamentos.
Ademais, dispoñen dun amplo catálogo en actividades formativas especializadas.
A empresa iniciou estes días os traballos de escavación nas dúas parcelas nas que levantará as súas catro naves e prevese que estea en funcionamento a principios do ano 2023.
Eurotec Inspección e Control iniciou en 2015 os seus servizos en Sanxenxo, Caldas e A Coruña, pero a intención da dirección é centralizar a súa actividade no parque empresarial de Nantes do que destaca “unhas vías de comunicación idóneas” para a súa actividade.
O polígono suma xa cincuenta parcelas ocupadas con proxectos empresariais e amplía o abanico de actividades económicas. O parque ten 261 parcelas para a actividade empresarial.
A maiores, o Concello dispón dunhas parcelas que suman 48.704 metros cadrados que, en principio, destinaranse a equipamentos públicos, entre os que destacan as novas sedes da Policía Local, o Servizo de Emerxencias e os servizos de mantemento, parques e xardíns.
O parque empresarial reúne polo menos seis actividades económicas distintas, pero os sectores que máis destacan por número e a superficie que ocupan son a alimentación e os materiais de construción, con seis e sete empresas en cada un destes segmentos.
En alimentación destacan Mercadona con case 10.000 metros cadrados ocupados, séguenlle Eroski con 6.000 metros cadrados e Xesnova global con 4.800 metros cadrados. No segmento dos materiais de construción hai empresas de carpintería de madeira, carpintería metálica, granitos e louza sanitaria.
Outro sector que destaca é o das enerxías renovables con Inelsa que, a maiores das dúas parcelas das que dispón, fixo unha alianza para a creación dunha fábrica de baterías de uso doméstico, outras presentes son actividades de loxística, un gran bazar, un tanatorio e unha gasolineira.
A todas estas sumarase a principios do ano que vén Eurotec Inspección S.L.
Relacionadas:
-
Primeiros pasos na tramitación do complexo municipal de servizos previsto no parque empresarial de Nantes
Por Redacción |
-
Urbanismo dá luz verde á edificación dun novo tanatorio de San Marcos no parque empresarial de Nantes
Por Redacción |
-
O parque empresarial de Nantes xa ten ocupadas o 20% das parcelas dispoñibles
Por Oskar Viéitez |