Ciencias Sociais, primeira facultade en acreditar a súa calidade académica
Por Redacción
Tralos procesos de verificación e de seguimento que pasaron os títulos de grao e máster das universidades galegas nos últimos anos, o vindeiro curso 2014-2015 comezará a terceira fase, a de acreditación, que se implantará con dous anos de retraso por unha moratoria do Ministerio de Educación, Cultura e Deporte.
Aproveitando este tempo extra, a Axencia para a Calidade do Sistema Universitario de Galicia (ACSUG) decidiu poñer en marcha un proxecto piloto para que un centro de cada rama do coñecemento das tres universidades galegas comece de xeito voluntario este proceso de acreditación da súa oferta académica.
A Facultade de Ciencias Sociais e da Comunicación do campus de Pontevedra será o representante da Universidade de Vigo neste proxecto experimental que servirá, segundo explica o reitor, Salustiano Mato, "como guía para facilitar o proceso ao resto dos centros, é un exercicio de xenerosidade".
O responsable da ACSUG explicou como a certificación da calidade dos títulos comprende tres procesos. No primeiro deles, o de verificación, as universidades propuxeron os proxectos títulos de grao, mestrado e doutoramento, cuxo deseño debía ser verificado. Por este proceso pasaron xa 345 títulos das tres universidades galegas, 119 de grao, 226 de máster, así como outros 82 de doutoramento.