Bueu aplicará o informe de accesibilidade sobre a Banda do Río elaborado por Xoán XXIII
Por Redacción
Xa se coñecen as conclusións do informe sobre accesibilidade cognitiva que elaborou a Asociación de Persoas con Discapacidade Juan XXIII para a zona da Banda do Río. Nunha reunión coa concelleira de Promoción Económica e Turismo, Silvia Carballo, os técnicos do colectivo aportaron as súas propostas para mellorar o proxecto piloto que o Concello está poñendo en marcha para construir "un Bueu totalmente inclusivo e accesible para todas as persoas”.
O Concello adoptará as medidas pertinentes para que a Banda do Río poida ser accesible e, posteriormente, estender esas propostas a outros espazos e infraestruturas municipais. Entre as medidas propostas están a adaptación da cartelería adaptada á contorna, sempre cun tamaño de letra suficiente e bo contraste entre figura e fondo, o uso de fácil lectura en todas as comunicacións e utilización de pictogramas identificativos en cada infraestrutura.
Silvia Carballo móstrase moi ilusionada con este proxecto “para o que contamos coas entidades que traballan a prol da inclusión social nos diversos eidos”, de aí que se mantivesen diversas reunións de traballo coa Confederación Galega de Persoas con Discapacidade (COGAMI), a Asociación de Xordos de Galicia (XOGA) ou a ONCE.
O informe que a Asociación Juan XXIII entregou á concelleira fai fincapé na importancia de que as zonas se fagan accesibles, “pois segundo a Declaración dos Dereitos Humanos de 1948, toda persoa ten dereito a descansar e gozar do tempo libre, gozar da natureza, e como non, das praias con todas as garantías de participación”.
Precisamente no barrio da Banda do Río conflúen unha gran cantidade de espazos de lecer, como o parque, o paseo de María Eugenia, o Estaleiro da Banda do Río ou a praia, polo que é idóneo para implementar este proxecto.