A deputada provincial do Partido Popular, Pepa Pardo, considera que a sentenza do Tribunal Supremo que condena á  Deputación por contratar a 38 falsos bolseiros "é un importante revés" para a presidenta da administración provincial, Carmela Silva "que ten que deixar de esconderse e dar moitas explicacións públicas ao respecto". 

Sobre esta "fraude na contratación dos becarios", pregunta a voceira dos populares se "é este o modelo de emprego do PSOE?" e critica "o escurantismo co que o bipartito envolveu todo este proceso". 

Ademais, o partido Popular di que é unha "burla á intelixencia da cidadanía" que "intenten responsabilizar ao PP dunha inspección laboral que se fixo en 2018, cando o bipartito xa levaba tres anos gobernando a Deputación, e que chama especialmente a atención sobre o caso dos mestres composteiros". 

Recordan que nesta sentenza están afectados becarios que prestaban servizo no propio Pazo da Deputación de Pontevedra, pero tamén noutros servizos, como a Finca de Mouriscade ou o Plan Revitaliza.

De feito, sinalan, "o que di a sentenza é que precisamente os mestres composteiros son o caso máis evidente de que se trata dunha relación laboral. Non só polo soldo, case 1.400 euros e moi por riba do que reciben o resto de becarios, senón tamén porque sinala a sentenza, a memoria demostrouse ser un mero formalismo e o 60% da plantilla eran becarios". 

Ademais, engade o PP, outra das cuestións que se recollían na acta da inspección de traballo era que a Deputación estaba negando dereitos aos becarios, e puxo como exemplo que se negou a un dos becarios permiso por intervención cirúrxica da súa nai.

"Que se deixen de buscar culpables e asuman a súa responsabilidade dunha vez por todas", conclúe Pepa Pardo.