Caldas ofrece colaboración á Xunta para facilitar a ampliación do IES Aquis Celenis
Por Redacción
O alcalde de Caldas de Reis, Juan Manuel Rey, informou este martes da recepción do borrador do convenio entre a Consellería de Cultura, Educación e Universidade da Xunta de Galicia e o Concello de Caldas de Reis para a ampliación do Instituto Aquis Celenis.
O alcalde xa solicitou os informes técnicos dos servizos municipais de Urbanismo e Intervención necesarios para poder formalizar a sinatura do convenio, e informou persoalmente á dirección do Instituto do contido do convenio.
Manifestou a súa dispoñibilidade para asumir os compromisos plantexados no borrador do convenio, entre eles o outorgamento das licenzas de edificación correspondentes, sempre que as obras proxectadas cumpran as determinacións do planeamento urbanístico, e a bonificar o 95% da contía do imposto municipal de construcións, instalacións e obras.
O Concello tamén colaborará na disposición dos espazos para reubicar ao alumnado durante a execución das obras e a facilitar terreos para un aparcadoiro disuasorio na zona. Tamén está prevista a peonización do vial que transcorre entre o Instituto e o CPI Alfonso VII e a reurbanización dos accesos aos dous centros educativos para garantir mellor a seguridade do alumnado.
Pola súa parte, a Consellería de Cultura, Educación e Universidade comprométese a licitar, supervisar e aprobar o proxecto básico e de execución para a obra de ampliación do Instituto e licitar a contratación para a execución da obra.
O convenio prevé que o convenio estea vixente ata a finalización de obras e, en todo caso, antes do 30 de setembro do 2024.
O alcalde celebrou que o borrador do convenio recolla as propostas realizadas dende o Concello e solicitará máis concrecións en relación ás necesidades de espazos alternativos para o alumnado durante a execución das obras, o programa detallado de usos previstos coa ampliación do edificio e as previsións sobre a oferta de ciclos de formación profesional que vén demandando o propio alcalde dende o ano 2018.
O alcalde destaca que a ampliación do Instituto Aquis Celenis "é unha necesidade fundamental para a xuventude e a sociedade de Caldas e da súa comarca e confiamos que, finalmente, será unha realidade que conseguiremos solucionar nesta lexislatura".
Relacionadas:
-
O Concello de Caldas de Reis valora positivamente o anteproxecto da ampliación do Instituto Aquis Celenis
Por Oskar Viéitez |
-
A Xunta investirá arredor de 3,5 millóns na ampliación do instituto Aquis Celenis
Por Redacción |
-
O martes asinarán o convenio para a ampliación do IES Aquis Celenis
Por Redacción |
-
Naturgy cede dúas parcelas en Caldas ao Concello para aparcamento
Por Redacción |
-
Román Rodríguez anuncia a ampliación do instituto Aquis Celenis en Caldas de Reis
Por Oskar Viéitez |
-
O Concello propón ampliar en altura o Instituto Aquis Celenis
Por Redacción |
-
Caldas quere expropiar a leira María a Recha e esixe á Xunta o proxecto de ampliación do IES Aquis Celenis
Por Redacción |