Fátima Abal dimite por motivos de saúde e Samuel Lago converterase en alcalde de Cambados
Por Redacción
A alcaldesa de Cambados, Fátima Abal, dimitirá do seu cargo oficialmente este sábado e, no seu lugar tomará a substitución na Alcaldía, segundo todas as previsións o ata o de agora concelleiro de Servizos, o tamén socialista Samuel Lago.
Fátima Abal é alcaldesa de Cambados desde xuño de 2015 e deixará o cargo por motivos de saúde, segundo ela mesma explicou aos seus compañeiros do PSOE nun escrito que se deu a coñecer nas últimas horas. O escrito é previo ao anuncio público, que se realizará este sábado.
"Desde hai tempo necesito descansar tanto mental como fisicamente", recolle o escrito dirixido aos socialistas de Cambados. Esta necesidade, segundo explica, "non é compatible con exercer a Alcaldía de maneira responsable".
A substitución dáse por sentado, pero non é tampouco oficial, pois deberán elixilo os concelleiros que conforman a Corporación de Cambados. Prevese que salga elixido coa maioría que apoia na actualidade a Abal, de PSOE, BNG e Somos Cambados.
Na súa carta, Fátima Abal dedícalle moitos eloxios enfocados a que logre ese apoio do resto de representantes políticos, pois é "serio, honesto, intelixente, traballador e moi próximo".
A aínda alcaldesa continuará con concelleira do Concello de Cambados, pero sen responsabilidades como as que ten nestes momentos.
Neste escrito de renuncia e despedida, Abal asegura sentirse "moi orgullosa" de todo o conseguido nos máis de seis anos e medio que leva no cargo e que deixa a Alcaldía "coa satisfacción de deixar un Cambados moito mellor".
A súa etapa co bastón de mando, segundo as súas propias palabras, "foron anos moi difíciles pero tamén moi felices".