A choiva modera a asistencia aos cemiterios por Todos os Santos
Por Diego Torrado
A choiva que caeu desde primeira hora da mañá deste venres baleirou os cemiterios de Pontevedra, Marín, Poio ou outros concellos das comarcas de Umia e O Salnés polo Día de Todos os Santos durante practicamente toda la xornada, a excepción das horas máis próximas á celebración de misas.
A afluencia de cidadáns aos camposantos foi inferior á doutros anos e a tónica dominante dos que desafiaron á choiva para render a súa homenaxe aos defuntos foi a de visitas breves ás tumbas e panteóns. Déronse moi poucas imaxes dos corros ou pequenas reunións habituais cada 1 de novembro nas entradas dos cemiterios.
Durante os días previos a actividade foi máis frenética nos recintos de toda a comarca, con cidadáns limpando lápidas e panteóns e colocando ramos, flores e coroas.
Este venres, os paraugas salpicaron os corredores, aínda que o que si se repetiron foron as imaxes de atascos e dificultades de estacionamento nas proximidades dos cemiterios, neste caso porque a maioría acudiu en coche para non mollarse.