O Plan Labora 2022 financiará 13 itinerarios formativos a persoas desempregadas e vulnerables
Por Redacción
A Xunta de Goberno da Deputación Provincial aprobou na súa última sesión un investimento de preto de 400.000 euros para financiar 13 itinerarios de formación que se desenvolverán no ano 2022 en Caldas, Vigo, O Porriño, Pontevedra, Baiona, Tui, O Rosal, Tomiño e Nigrán dentro do Plan Labora.
Estas actividades formativas teñen como obxectivo mellorar a empregabilidade das persoas desempregadas en situación de vulnerabilidade na provincia e beneficiarán a preto de 200 persoas.
Estes novos itinerarios aprobados nesta convocatoria son de Actividades auxiliares de almacén, que se desenvolverá no Porriño e Caldas de Reis para un total de 30 participantes; de Limpeza de superficies e mobiliario en edificios e locais, que terá lugar en Vigo, Pontevedra e Tui, para un total de 45 persoas beneficiarias; ou de Dinamización de actividades de tempo libre educativo, infantil e xuvenil en Vigo e Pontevedra, cun total de 30 prazas
Tamén haberá formación de Socorrismo en instalacións acuáticas, en Pontevedra, con 15 prazas; Socorrismo en espazos acuáticos naturais, en Baiona, para 15 persoas; Servizos auxiliares de salón de peiteado, que terá lugar en Pontevedra para un máximo de 15 participantes; Traballos de carpintería e moble, que beneficiará no Rosal a 15 persoas; Actividades auxiliares en conservación e mellora de montes, que terá lugar en Tomiño con 15 prazas; e Seguridade Informática, que se desenvolverá en Nigrán e tamén con 15 prazas.
O prazo de preinscrición para participar nestas actividades xa está aberto na sede electrónica da Deputación. Hai que lembrar que Labora 2020 está dirixido a persoas desempregadas, inscritas como demandantes de emprego e que pertenzan a colectivos vulnerables (persoas desempregadas de longa duración, mozas e mozos menores de 30 anos, maiores de 55 anos, persoas con diversidade funcional, inmigrantes, e minorías étnicas e comunidades marxinadas).
A Deputación desenvolve este proxecto desde o pasado 2020, cun investimento total de 4,7 millóns. Contempla un total de 58 accións formativas e xornadas de activación que ao termo do programa, en decembro do 2022, terán beneficiado a un total de 870 persoas participantes.