Os voluntarios do Banco de Alimentos toman os supermercados pontevedreses coa súa Gran Recollida 2021
Por Redacción
Segue sendo unha recollida de alimentos atípica, pero o seu éxito é fundamental para axudar a un importante número de familias e asociacións ao longo do ano.
A Fundación Provincial Banco de Alimentos protagoniza estes días a súa Gran Recollida 2021.
Debido á pandemia esta acción non supón a recollida de alimentos físicos, pero igualmente ata 200 voluntarios presentáronse este venres e sábado en supermercados de Pontevedra, Marín, Lalín, Sanxenxo, Vilagarcía, Soutomaior e Caldas de Reis.
O seu obxectivo é trasladar aos clientes destes establecementos os mecanismos de doazón da campaña, que conta con tres vías posibles de colaboración: achegas económicas nas caixas dos supermercados, adquirindo cestas solidarias ou cunha transferencia ou Bizum seguindo as indicacións que se atopan reflectidas en www.bancoalimentosvigo.org.