Así se prepara a Brilat para poder despregarse nunha misión nun prazo de 5 a 20 días
Por Natalia Puga
A partir do 1 de xaneiro de 2013 a Brilat integrarase na Forza Conxunta de Reacción Rápida (FCRR), constituída por unidades de alto grado de dispoñibilidade e adestramento, capaz de constituírse nun periodo breve de tempo para misións de continxencia. Pola propia natureza da Brigada, adéstrase durante todo o ano para asumir este tipo de misións, pero desde esta semana está, se é posible, máis preparada. ÿ o resultado da súa estancia no Centro Nacional de Adestramento (CEADE) de San Gregorio, en Zaragoza.
Un total de 1.500 militares da Brigada de Infantería Lixeira Galicia VII participan desde o luns 14 ata o 29 de outubro nun exercicio de adestramento específico destinado á súa preparación de cara aos seus compromisos nacionais e internacionais, pero, sobre todo, con motivo do seu activación na FCRR.
Finalizada esta preparación, a partir do 1 de xaneiro de 2014, estarán en disposición de despregar unha Brigada Lixeira de Alta Disponibidade (BRILAD), unha Agrupación Táctica (AGT) e un Grupo Táctico (GT) cun elevado grao de dispoñibilidade que varía entre os 20 e os 5 días dependendo da entidade da unidade a despregar.
O exercicio que están realizando bautizouse 'Dragón 13' e diríxeo o Mando de Forzas Lixeiras (MFUL) coa finalidade de lograr a avaliación e certificación previa necesaria para constituír as unidades que formarán parte da FCRR durante o ano 2014.
As dúas primeiras fases do exercicio desenvolvéronse ata este xoves 24 de outubro. Son os denominados exercicios de pequenas unidades e avaliación e certificación das unidades que compoñen a Agrupación Táctica Lixeira de Alta Dispoñibilidade (AGTLAD) da FCRR e leváronse a cabo diferentes exercicios de tiro con armamento individual e colectivo que non poden realizarse noutros campos de manobras.
Ademais, realizáronse exercicios de lume real de nivel Grupo Táctico (GT) con apoio de Artillería e Zapadores, exercicios de embarque e desembarque de persoal e material en diferentes tipos de helicópteros e unha operación de helitransporte de nivel GT. O broche final poñerao o exercicio de avaliación e certificación da AGTLAD.
Ademais dos 1.500 militares da Brilat, participan o persoal e os medios achegados por outras unidades do Exército de Terra: Forza Aeromóbil do Exército de Terra (FAMET), Mando de Artillaría de Campaña (MACA), Mando de Artillaría Antiaéreo (MAAA), Brigada Loxística (BRILOG), Xefatura de Tropas de Montaña (JTM), Comandancia Xeral de Baleares (COMGEBAL); así como a Compañía Monteiros de Espinosa da Garda Real e unha Compañía do Exército Británico do Royal Irish Regiment.