Moreira responsabiliza só a Lores dos "escandalosos" datos de paro e este pídelle "que pregunte a Rajoy"
Por Alejandro Espiño & Natalia Puga
Pontevedra tiña en 1999 un total de 3.585 parados. Actualmente son xa 10.400, segundo denuncia o PP. Estes datos, que recolle a Enquisa de Poboación Activa (EPA), arroxan un aumento do 190% no número de desempregados do municipio. E o Partido Popular achaca estes números á xestión do goberno municipal de Miguel Fernández Lores. Asegura o seu portavoz, Jacobo Moreira, que o alcalde "mira hacia otro lado, como si el paro no fuese cosa suya".
Moreira, que asegurou estar "escandalizado", tanto pola "contundencia" desta estatística como pola "indolencia" do goberno municipal "para presentar algún tipo de respuesta frente a estos números", afirmou que esta cifra de parados "no dejar lugar a dudas sobre las dificultades de la ciudad para caminar hacia la recuperación económica". Destaca que mentres o paro baixou un 4% en Galicia "nosotros nos situamos en un vergonzoso record negativo".
O portavoz popular recordou que desde hai dous anos non se reúne o Consello Económico e Social, que aglutina aos principais axentes activos da cidade, e criticou o "ridículo" Plan de Emprego anunciado recentemente polo PSdeG-PSOE. En lugar diso, dixo, "se dedican todas las inversiones a ampliar aceras y se amplía una creciente política fiscal y de sanciones de tráfico", que sumado á ausencia de políticas de emprego "está ahogando la ciudad".
LORES RESPONDE CON DUREZA
Fronte a estas declaracións, nas que Moreira non facía responsable á Xunta e ao Goberno no aumento do paro, o alcalde de Pontevedra asegurou estar "moi preocupado" polo número de desempregados, pero acusou de "demagogos" aos populares. "Son os menos indicados para dicir nada", afirmou. "Non vou entrar nun xogo no que resulta que somos os responsables da situación económica do país, non é a Xunta nin o Goberno do estado".
"A Moreira deberíalle caer a cara de vergonza. Se eu fose do Partido Popular andaría agachado cunha capucha para que non me viran", dixo Lores
Miguel Fernández Lores subliñou que o goberno municipal non é responsable da subida do IVE ou o IRPF, da reforma laboral, dos recortes no sector público ou do aumento da débeda pública, "que estamos pagando todos os cidadáns cando non temos nada que ver". Por iso é polo que reclamou a Moreira que "se lle preocupa os problema dos cidadáns pontevedreses", traslade estas reflexións a Mariano Rajoy "para que fagan outra política financieira".
"Este señor (por Moreira) non ten autoridade moral para plantear ningunha cousa deste tipo, sobre todo cando o fai tan retorcidamente", afirmou o rexedor pontevedrés, quen lamentou as escasas competencias que, en materia de emprego, teñen os concellos. Fronte a isto lanzou un reto: "dime unha soa cousa que o Goberno da Xunta fixera neste país e que xerara algún posto de traballo en sectores primarios, básicos ou que tiveran futuro. Nin unha".
Por iso Fernández Lores concluíu asegurando que a Moreira "deberíalle caer a cara de vergonza". Dixo que se el fora un cargo público do Partido Popular "andaría agachado cunha capucha para que non me viran" e acusou a Moreira de "facer carroña" cun tema tan sensible como o paro, "cando tantas familias están moi fastidiadas e non teñen perspectivas de futuro porque aquí se dedican só a recortar en vez de xerar actividade económica".