Os magostos ábrense camiño na comarca
Por Redacción
Nada mellor para combater o frío destes días que unha boa ración de castañas asadas. Iso é o que pensaron todas as persoas que durante esta fin de semana participaron nos magostos populares que, como sempre por estas datas, empezan a poboar a comarca.
Un deles foi o organizado pola asociación de veciños Eduardo Pondal, que celebrou o seu magosto na Praza da Curtidoira.
Castañas asadas ou chourizos ao viño foron os produtos típicos do outono que se puideron degustar nesta festa, que contou ademais con música popular, baile e xogos populares para nenos para amenizar esta xornada de convivencia veciñal.
Tamén houbo magosto en Cerponzóns, neste caso a cargo da asociación de veciños O Chedeiro e da asociación cultural e deportiva Chan do Monte.
Foi no atrio da igrexa parroquial, onde se ofreceron castañas e chocolate aos asistentes, que ademais puideron gozar da música do grupo folk Sete Tarabelos.
No caso de Marín, os organizadores foron os membros da asociación de pescadores Tenlo, que asaron 45 quilos de castañas no Parque Azul, onde ofreceron viño e queimada.
A ambientación musical correu a cargo do grupo folclórico Pousos da Area.