Denuncia de Vaipolorío contra Red Eléctrica Española pola corta de vexetación de ribeira en Bertola
Por Redacción
Xosé Manuel Feijoó Bernárdez, secretario da asociación Vaipolorío, presentaba nas últimas horas unha denuncia contra a empresa Red Eléctrica Española como causante dunha corta de vexetación de ribeira na contorna do río Gafos, ao seu paso por Bértola, no municipio de Vilaboa, onde o colectivo ecoloxista realiza traballos de limpeza e mantemento da contorna natural.
Segundo a denuncia presentada #ante Augas de Galicia e a Consellería de Medio Ambiente, Territorio e Vivenda, esta actuación realizábase nas proximidades dun poste de tendido eléctrico desta empresa. Esa limpeza conlevou a eliminación de maneira "indiscriminada" de vexetación ripícola nas dúas marxes do río ao longo de 50 metros seguindo os terreos polos que atravesa a liña.
Vaipolorío entende que esta intervención non respectou o disposto na Lei 7/92 de Pesca Fluvial nin o decreto do Regulamento de Ordenación de Pesca Fluvial e dos Ecosistemas Acuáticos Continentais.
Consideran que non se respectaron os catro metros de altura que debe manter a vexetación arbórea de ribeira e os traballos centráronse en realizar unha corta a rentes do chan, destruíndo o bosque de galería nas dúas marxes, co prexuízo que supón para o desprazamento da fauna e flora ligada ao ecosistema fluvial, segundo consta na denuncia presentada por rexistro.
Ademais, Xosé Manuel Feijoó afirma que esta corta non é a primeira vez que se produce e a asociación xa presentara outra denuncia por danos similares nese mesmo espazo.
Relacionadas:
-
Vaipolorío acomete a poda da "maceira de río" no Gafos
Por Redacción |
-
Vaipolorío recupera a lenda do demo asubiador para felicitar as festas
Por Redacción |
-
Unha ducia de voluntarios limpa a presa do Muíño de Cabanas
Por Redacción |
-
Retiran 220 quilos de lixo do río Gafos nunha nova xornada de limpeza de Vaipolorío
Por Redacción |
-
Vaipolorío esmérase no coidado do muíño e a presa do río Toxal
Por Oskar Viéitez |
-
Atopan no Gafos unha herba descrita e debuxada polo Pai Sarmiento en 1755
Por Redacción |