Case 1.600 quilos de residuos son os que retiraron este sábado mariscadoras da confraría de pescadores de San Antonio e diversos voluntarios dos fondos marisqueiros de Cambados.

Esta actividade de limpeza enmárcase dentro do programa Plancton, unha iniciativa de Afundación e Abanca para protexer a biodiversidade das zonas mariñas de Galicia.

Vellos pneumáticos semienterrados e grandes conxuntos de cordas e cabos enmarañados que viñan obstaculizando ata a data o traballo das mariscadoras, foron os obxectos máis voluminosos retirados durante o transcurso da actividade.

Un dos grupos dedicouse a retirar vidro, contabilizando máis de 4.500 fragmentos.

Ademais, nasas, metal non identificable, botellas e botes de plástico, unha batería de coche, unha bengala mariña, latas de refresco, plásticos de diversa índole, un reloxo ou unhas chaves de coche completan o abanico de residuos retirados nesta xornada de limpeza.

A actividade contou tamén coa colaboración do Concello de Cambados, quen se encargou de trasladar os residuos ao punto limpo, unha vez finalizadas as tarefas de clasificación e pesada coas que se puxo punto e final a esta intensa e frutífera mañá de voluntariado ambiental. 

A próxima parada do proxecto Plancton será o sábado 16 de outubro na Lanzada, onde se realizará unha gran batida de limpeza de residuos ao longo de todo o areal.