O plan de mellora de camiños continúa en Cuntis coa renovación do camiño da N-640 ao enlace de Soutelo, na parroquia de San Mamede de Piñeiro. A obra realizarase en diferentes fases debido á forte inversión necesaria para o tramo de tres quilómetros.

Na primeira fase, o Concello realizou un varrido do pavimento existente por medios mecánicos e escavaron e limparon as cunetas para a mellora da evacuación das augas pluviais.

Tamén actuaron nos bordes para ampliar a plataforma destinada á circulación de vehículos, favorecendo a circulación segura en ambos sentidos.

Segundo informaron desde o goberno local, a obra conta cun investimento de 43.930,77 euros. Nel contribuíron o Ministerio de Agricultura, Pesca e Alimentación, o Fondo Europeo de Desarrollo Rexional (FEDER) e a Axencia Galega de Desenvolvemento Rural (AGADER).