Comezan as xornadas de atención a alumnos con diabete
Por Redacción
A Consellería de Educación pon en marcha este luns 21 as xornadas de atención ao alumnado con diabete. Este curso desenvólvese no Centro de Formación e Recursos de Pontevedra e ten como principal obxectivo que os profesores de colexios aos que asistan alumnos con esta patoloxía poidan coñecer as pautas que se deben atender nas diferentes situacións que poden darse tanto en actividades escolares e extraescolares.
O xefe territorial de Cultura e Educación, César Pérez, mantivo nos últimos días unha reunión cos responsables da Asociación de Nenos e nenas con Diabete de Galicia (ANEDIA) que lle transmitiron a súa preocupación pola necesidade de atención específica para estes alumnos.
Por este motivo durante tres xornadas, este luns 21, o mércores 23 e o luns 28 desenvolverase o programa de formación que permitirá ao profesorado atender aos alumnos en situación de emerxencia durante a xornada escolar e dotar os profesores de coñecementos e habilidades para traballar con eles.
Dende Anedia recordan que a diabete mellitus tipo I (DMI) constitúe un problema de saúde crónico cada vez máis frecuente e que implica a creación de situacións potencialmente complexas derivadas da aparición de hipoglicemias. A diabete é a segunda enfermidade crónica máis frecuente na infancia e na adolescencia despois da asma e non afecta nin ás capacidades intelectuais nin de aprendizaxe.