Piden unha condecoración para o axente que resultou mancado ao salvar unha muller vítima de violencia de xénero
Por Redacción
A Unión Federal de Policía de Pontevedra (UFP) solicita publicamente que se condecore ao axente da Comisaría Provincial da Policía Nacional, que durante a fin de semana rescatou a unha muller que estaba a punto de precipitarse ao baleiro desde un cuarto andar da rúa San Mauro. O rescate sacouno á luz o Sindicato Unificado de Policía (SUP) a través das redes sociais reclamando xa un recoñecemento para o traballo policial.
A muller, vítima de violencia de xénero, foi rescatada a través da xanela dun piso adxacente nun "acto heroico dun axente da Policía Nacional, o cal, antepoñendo o benestar da vítima puxo en risco a súa vida, logrando introducir a esta muller no interior da vivenda", sinalan desde a UFP.
Indican, ademais, que o axente sufriu diferentes lesións en bonecas, lumbares e costado debido ao uso extremo da forza para axudar á muller.
Por este motivo, este sindicato policial, maioritario na cidade, solicita para o axente o ingreso na Orde do Mérito Policial con distintivo vermello ao poñer en perigo a súa vida e manifestar o seu valor.
O secretario provincial de UFP, Carlos Rodríguez Losada, solicitou por escrito este ingreso e que se lle recoñezan as lesións desa intervención en acto de servizo. "Se se condecora a mandos policiais con medallas de prata ao Mérito Policial só pola súa xestión, que merecen os axentes que nunha actuación resultan feridos para salvar a unha vítima?", expón o representante sindical, que considera xusto premiar e recoñecer aos axentes que dan máis do esixible nas súas funcións policiais.