Presentación do Plan de Turismo Sostible de Marín aos representantes do sector
Por Redacción
A alcaldesa de Marín, María Ramallo, acompañada da concelleira de Turismo, Cristina Acuña, presidía na tarde deste mércores no Museo Manuel Torres unha reunión con representantes do sector turístico do municipio para expoñerlles o Plan de Turismo Sostible que se presentará aos fondos dos Plans Turísticos de Sostibilidade en Destino (PSTD).
As liñas mestras que subxacen a todas as actuacións que se incluirán na estratexia céntranse en afianzar Marín como destino de escapada, sostible e de calidade, centrado no turismo "slow"; xerar novos produtos e equipamentos turísticos; e promover un crecemento turístico sostible e integrado no medio. "Temos un espazo privilexiado que debemos aproveitar, explotando os nosos recursos desde un punto de vista sostible e planificado", apuntaba María Ramallo.
O obxectivo da reunión, explicaba a alcaldesa ás entidades presentes, "é o de poder achegarvos (ao sector) eses proxectos que consideramos esenciais e que redundarán nunha mellora para todos os actores que inflúen na pulsión turística do concello".
Hostalaría, entidades deportivas, establecementos de pernoctación, restauración, ocio ou cultura foron as áreas representadas na Mesa de Participación, que serviu para intercambiar opinións respecto das actuacións englobadas na estratexia e dos obxectivos que se perseguen co impulso deste plan.
O Concello de Marín prevé un investimento de 2 millóns de euros, polo que fará a proposta aos fondos con este montante, que, en caso de conseguilo, iría executándose cun horizonte temporal de 2022-2023.
Segundo adiantou a rexedora, "traballaremos para conseguir a financiación, xa que consideramos que somos un municipio con alto atractivo turístico no que aínda temos moitos proxectos que potenciar, que nos permitirán revalorizarnos como un foco de atracción no corazón das Rías Baixas".