Case 50.000 alumnos de ESO e Bacharelato regresan este mércores ás aulas pontevedresas
Por Redacción
Os centros educativos da provincia prepáranse para a segunda volta as aulas deste mes. Tras o regreso do alumnado de Infantil e Primaria, este mércores é a quenda en ESO e Bacharelato.
Os datos achegados por Educación reflicten que case 50.000 nenos e nenas de toda a provincia de Pontevedra retomarán a súa actividade lectiva nos próximos días. En concreto, serán 36.430 alumnos da ESO e outros 12.343 dos cursos de Bacharelato.
As cifras de matriculación non serán definitivas ata dentro dunhas semanas, dado que aínda nos últimos días se realizaron exames de recuperación en Secundaria. Ademais, aínda é posible matricularse nos ciclos formativos que contan con prazas libres.
Malia a provisionalidade dos datos, segundo as estimacións da Consellería de Educación, en ESO e Bacharelato apenas se producen variacións, con cambios focalizados nos últimos cursos.
Na ESO regresarán 24.980 alumnos e alumnas aos centros públicos, 10.459 aos colexios concertados e 991 aos centros privados.
Pola súa banda, 10.442 estudantes retomarán a actividade académica nos institutos públicos da provincia de Pontevedra, mentres que outros 1.901 deberán facelo nos privados.