Un ex campión da NBA en Ponte Sampaio
Por Alejandro Espiño
Un peregrino ilustre chegou nas últimas horas a Ponte Sampaio. Trátase do ex xogador da NBA Craig Hodges, campión da liga estadounidense de baloncesto cos Chicago Bulls.
Hodges, acompañado do adestrador axudante do Obradoiro, Gonzalo Rodríguez, cruzou a ponte medieval de Ponte Sampaio tras saír ao amencer do albergue de Vigo.
O exdeportista de 61 anos está a percorrer o Camiño Portugués pola costa dentro da iniciativa O Camiño acaba en Obradoiro, organizada polo equipo santiagués da liga Endesa.
"Isto é incrible. Non me esperaba isto. É algo que hai que facer na vida", asegurou Craig Hodges ao chegar á parroquia pontevedresa.
Satisfeito por conseguir completar tamén a segunda etapa e agradecido pola compañía e as longas charlas de baloncesto, pero tamén da vida, Hodges ceará nun restaurante de Marín e descansará nun hotel de Pontevedra.
Este martes afrontará a terceira etapa desta ruta, percorrendo o tramo que vai desde Pontevedra ata o parque da Barosa, en Barro.