25 prazas por sesión para coñecer pazos, mosteiros, igrexas e castelos da provincia nas Rutas de Arquitectura
Por Redacción
En setembro comezan as Rutas de Arquitectura, que promove a Deputación de Pontevedra en colaboración coa Real Academia de Belas Artes, coa idea de promocionar o patrimonio da provincia.
Nesta ocasión ofértanse 100 prazas, 25 por cada unha dos roteiros. As reservas poden realizarse a través do correo electrónico roteiros.cultura@depo.gal indicando que roteiro se escolle, os nomes das persoas participantes, máximo catro por reserva, e deixando un teléfono de contacto.
Os catro percorridos previstos serán durante sábados pola mañá, entre as 10.00 e as 13.30 horas, e os itinerarios realizaranse ao longo de dez municipios da provincia. As doutoras en Arquitectura Estefanía López e Luz Paz serán as encargadas de guiar ao longo das sesións.
O primeiro percorrido será o 18 de setembro con roteiro por Pontevedra e Poio. As persoas participantes coñecerán detalles das Ruínas de Santo Domingo, pazos urbanos e as igrexas da Peregrina e San Bartolomeu en Pontevedra, ademais do Mosteiro de Poio.
A segunda camiñada será o 25 de setembro na comarca do Baixo Miño, cun achegamento ao Mosteiro de Santa María de Oia, á igrexa de Santa María e ao Castelo de Santa Cruz na Guarda e unha visita á Fortaleza de San Lorenzo de Goián en Tomiño.
O 2 de outubro vai desenvolverse unha visita á comarca de Caldas, nos concellos de Catoira e Moraña. Percorrerase o Santuario dos Milagres de Amil e as Torres do Oeste, ademais da ermida e a carballeira de San Cibrán de Dimo.
O 9 de outubro, os participantes acudirán á comarca do Salnés para iniciar un roteiro no Mosteiro da Armenteira, en Meis, e percorrer a Igrexa de Santa Mariña de Dozo, en Cambados; e o Pazo Quinteiro da Cruz en Ribadumia.
ABERTO O PRAZO PARA INSCRIBIR NO ROTEIRO ORNITOLÓXICO ' VOANDO NAS RÍAS BAIXAS'
A Deputación de Pontevedra tamén abre este luns 23 o prazo para inscribirse na segunda dos roteiros ornitolóxicos do programa 'Voando nas Rías Baixas', que organiza a institución provincial con SEO Birdlife.
Esta camiñada guiada e gratuíta para observar as aves desenvolverase o 5 de setembro pola Serra do Cando, atravesando os municipios de Cerdedo-Cotobade, A Lama, Forcarei e Beariz. Trátase dun sistema montañoso da provincia protexido pola Rede Natura 2000 dun alto valor ecolóxico, que se caracteriza pola presenza do lobo ibérico e de aves rapaces.
A excursión será conducida por dous experimentados guías de SEO Birdlife Pontevedra. Aconséllase aos participantes vestir roupa cómoda e calzado para moverse polo campo, ademais de protector solar. Cada participante terá á súa disposición prismáticos de observación de aves, así como dous telescopios terrestres de alta gama para poder ver as aves sen molestalas. Tamén recibirán material didáctico.
As persoas interesadas poden apuntarse a través da páxina web da Deputación.