Os hostaleiros do Grove poden abrir o interior dos seus locais
Por Oskar Viéitez
Este luns publicarase un número extraordinario do Diario Oficial de Galicia (DOG), no que se fará oficial que O Grove deixa de ser o único municipio da nosa comunidade no nivel máximo de restricións por covid-19.
Así llo avanzou este sábado o conselleiro de Sanidade, Julio García Comesaña ao alcalde do Grove, José Cacabelos.
O cambio ao nivel alto permitirá á hostalería do Grove seguir traballando como ata o de agora, co 30 por cento de aforo no interior dos locais e co 50 por cento nas terrazas. Evitan deste xeito ter que pechar o interior dos bares e restaurantes.
O conselleiro de Sanidade xustificou esta rebaixa no nivel de restricións na melloría que se experimentou na localidade nos últimos días, cunha incidencia acumulada a 14 días por baixo dos 500 casos por cada 100.000 habitantes. O pasado 3 de agosto O Grove tiña 227 casos activos de coronavirus e este sábado día 14 xa eran só 90.
O cambio entrará en vigor na noite do luns ao martes.