Violeta Mosquera dá "un pouco de caña" nun pregón da Peregrina sen prexuízos, feminista e reivindicativo
Por Diego Espiño & Cristina Saiz
"Gustaríame facer o meu discurso en linguaxe inclusiva para que todas as persoas se vexan representadas". Con esta declaración de intencións comezou a súa intervención Violeta Mosquera sobrepoñéndose á protesta dos traballadores de ENCE para ofrecer un pregón das Festas da Peregrina repleto de dignidade, reivindicación e feminismo.
A batería e voz da banda de rock Bala sobrepúxose ao complicado da situación acompañada de familiares e amigos para reivindicar unha Pontevedra "sen complexos" que " é moito", porque "Pontevedra é cultura, é diversidade", resaltou.
"Saben de sobra que si me traen aquí, vou aproveitar para dar un pouco de caña. Porque creo que realmente é preciso". Con esa máxima a pregoeira referiuse á violencia de xénero, á saúde mental, á crise climática pedindo consumir "con responsabilidade, merquemos local", ou á desigualdade das mulleres, lembrando "cantos impedimentos atopei no meu camiño como música, cantas veces me dixeron que onde ía ir tocando a batería ou deron por feito que era a moza dun músico cando chegaba a tocar".
Mosquera fixo tamén un chamamento ao "amor libre, sen prexuízos" convidando a todos os pontevedreses "a gozar, con cabeciña, de toda a oferta cultural que ofrece a cidade para estes tempos de festa. Acudide aos concertos, apoiade as artes e a cultura, pois son tempos difíciles".
Luguesa de nacemento pero pontevedresa xa por dereito propio e elección, a pregoeira recoñeceu terse enganchado enseguida á vida cultural pontevedresa vendo "medrar marabillosos proxectos como o Liceo Mutante ou o Surfing the Lérez" ou participando noutra aventura como a do Estudo Bonobo.
Para terminar, tras agradecer a oportunidade de abrir as festas, Violeta Mosquera pechou o seu discurso cunha breve referencia cara á protesta de ENCE, convidándoos a todos ao concerto que a súa banda, Bala, ofrece este sábado nas pistas de Campolongo dentro da programación da Peregrina. "Iso si que vai ser ruído", sinalou con ironía e dignidade desde o palco da Alameda.
Oficialmente Pontevedra xa está en festas.
Relacionadas:
-
Pol Granch e o fenómeno fan, protagonistas na Praza de España na terceira noite de concertos da Peregrina
Por Redacción & Mónica Patxot |
-
Sen incidencias nas primeiras actividades das festas dunha Peregrina que "trouxo o verán"
Por Mónica Patxot & Cristina Saiz & Anxo Lourido |
-
Los Brincos fan retroceder no tempo ao público pontevedrés
Por Redacción & Cristina Saiz |
-
Pontevedra contáxiase do espírito das Festas da Peregrina
Por Redacción & Cristina Saiz |
-
Xabier Díaz, Bala e Carlota Crey inauguran a semana de concertos da Peregrina
Por Redacción & Cristina Saiz |
-
Carme da Silva denuncia "agresións con elevada violencia" na protesta dos traballadores de ENCE
Por Diego Espiño |
-
VÍDEO.- Traballadores de ENCE rebentan o pregón da Peregrina e acosan á corporación municipal
Por Diego Espiño & Cristina Saiz |
-
RADIO.- Violeta Mosquera: unha 'Playlist' en feminino coa pregoeira das festas da Peregrina
Por Cristina Saiz & Marisa Ciordia |
-
Pontevedra levanta o pano das festas da Peregrina
Por Manu Otero |
-
As Festas da Peregrina xa teñen pregoeira: Violeta Mosquera, batería de Bala
Por Alejandro Espiño & Cristina Saiz |