Alertan do "deterioro progresivo" de bens eclesiásticos no rural pontevedrés
Por Natalia Puga
O Concello de Pontevedra detectou nos últimos tempos unha "situación de deterioro e certo abandono" nalgúns bens situados nas parroquias do rural pontevedrés que forman parte do patrimonio eclesiástico.
O edil de Patrimonio, Luis Bará, explicou que se detectaron estas deterioracións, principalmente, en tres parroquias: Alba, Cerponzóns e Campañó. Tras constatar a situación, xa se puxo en contacto con diversos responsables eclesiásticos para denunciar o que sucede e facerlle un chamamento a que actúe, pero a petición aínda non fixo efecto.
Os principais danos están relacionados cos muros e peches de determinadas igrexas. En concreto, en Campañó derrubouse dous puntos distintos do muro perimetral, nun incidente que non só implica a perda de bens, senón que pode levar consigo riscos para as persoas. En Cerponzóns tamén houbo problemas cos muros e a situación da reitoral de Alba é "a que máis nos preocupa" porque presenta un "deterioro progresivo".
Bará alerta de que "tememos que poida levar á perda de bens valiosos" e cre que é necesario que se establezan vías de colaboración entre o Concello, a Xunta de Galicia e a Igrexa para poñerlle freo.