Valdecorvos crece coa construción de dezasete novas vivendas unifamiliares
Por Alejandro Espiño
O barrio de Valdecorvos segue dando pasos para completar a súa fisonomía. O goberno municipal concedeu licenza para construír dezasete novas vivendas unifamiliares de protección autonómica. Ocuparán unha parcela de 1.990 metros cadrados de superficie.
Cada vivenda encostada terá uns 119 metros cadrados e, na súa construción, a promotora deste proxecto, a cooperativa Pradonovo, investirá preto de 1,5 millóns de euros.
Trátase da segunda fase dun proxecto inmobiliario xa desenvolto en Valdecorvos.
Estas vivendas, ao contar con protección oficial, saíron ao mercado cun prezo taxado.
A portavoz do executivo local, Anabel Gulías, celebrou a activación desta promoción porque permite "dar forma" a este barrio pontevedrés, unha das zonas da cidade que máis está a crecer nos últimos anos.
"Estamos impacientes por ver o resultado", sinalou Gulías.