Lixeira melloría na situación da UCI de Montecelo mentres a pandemia segue sen control, con 50 novos positivos
Por Natalia Puga
A pandemia da covid-19 confirma este xoves a mesma tendencia á alza das dúas últimas semanas e o Servizo Galego de Saúde volveu a detectar 50 novos positivos nun só día na área sanitaria de Pontevedra e O Salnés.
Segundo o balance diario, este xoves a único melloría dáse na situación da unidade de Coidados Críticos do Hospital Montecelo, que pasa de ter 5 pacientes o mércores a tan só tres este xoves.
En total, hai 14 pacientes hospitalizados, dous menos que o día anterior, xusto estes dous que xa non están en UCI. En planta de hospitalización non hai cambios e seguen ingresadas 11 persoas, 7 no Complexo Hospitalario Universitario de Pontevedra e 4 no Hospital do Salnés.
En total, este xoves hai 615 casos activos, 35 máis que o día anterior. En total, houbo 50 novos positivos, pero déronse tamén 15 altas a pacientes.
Ademais dos 14 pacientes ingresados hai 601 persoas que se atopan no seu domicilio en illamento por dar positivo en covid-19.
Desde o inicio do plan de continxencia da covid-19 curáronse 14.280 pacientes e faleceron por este virus na área sanitaria 181 pacientes.
Ata o de agora, realizáronse 254.565 probas PCR' s desde o inicio da pandemia na área sanitaria, das que 849 foron nas últimas 24 horas.
EVOLUCIÓN EN GALICIA
A nivel autonómico, o balance oficial confirma este xoves 412 contaxios novos. En total, hai 3.231 casos activos, 314 máis que o día anterior.
Como sucede en Pontevedra, no conxunto de Galicia os pacientes de UCI descenden, con tres menos que o día anterior. En total, hai 58 hospitalizados, 49 en planta e 9 na unidade de críticos.
Os casos activos soben en todas as áreas sanitarias. A Coruña segue sendo a de maior afectación, con 709 casos activos, 40 máis que o mércores, con 86 novos positivos na última xornada.
En Vigo hai 636 casos, 64 máis que o día anterior, tras confirmar 76 contaxios. En Pontevedra son 615, 35 máis que o día anterior tras sumar 50 novos positivos.
En Ourense hai 483, 84 máis nunha xornada, tras 90 novos contaxios. En Lugo son 352, 38 máis que o día anterior, tras confirmar 46 máis. En Santiago teñen 313, 38 máis, tras sumar 48. En Ferrol son 123, 15 máis, tras unha xornada na que se detectaron 16 novos positivos.
Desde o inicio da pandemia faleceron en Galicia 2.439 persoas, 1 nas últimas 24 horas.
Relacionadas:
-
Sesenta e seis novos contaxiados elevan a 663 os casos activos por covid-19 na área sanitaria
Por Alejandro Espiño |
-
As farmacias de Pontevedra xa poden expedir o certificado de vacinación da covid-19
Por Redacción |
-
A covid-19 segue en expansión na área sanitaria: 43 novos positivos e 16 pacientes no hospital
Por Natalia Puga |
-
A pandemia, disparada na área sanitaria, con tres pacientes máis no hospital e 55 contaxios nun día
Por Natalia Puga |