Condenan a 720 euros de multa e traballos sociais dous mozos por tirar colectores á estrada
Por Natalia Puga
Unha multa de 720 euros (dous euros ao día durante un ano) e oito días de traballos en beneficio da comunidade. Este é o prezo que deben pagar dous mozos de 22 e 23 anos por tirar colectores á estrada na zona do Burgo poñendo en perigo a circulación de vehículos.
Os feitos aconteceron sobre as 5.00 horas da madrugada do sábado 28 de setembro e foron sometidos a un xuízo rápido o 2 de outubro nos xulgados da Parda. Os dous rapaces, ambos os dous veciños de Pontevedra, remataron condenados por un delito contra a seguridade vial na súa modalidade de actuacións que orixinan un grave risco para a circulación por colocar na vía obstáculos imprevisibles.
Os dous condenados foron sorprendidos cando avanzaban dende a ponte do Burgo e a avenida da Coruña cara a Juan Bautista Andrade e ao seu paso ían tirando os colectores. Unha patrulla da Policía Local acudiu ao lugar e comprobou que había colectores obstaculizando a circulación de vehículos e provocando un grave risco para os coches. Algúns dos colectores cortaban por completo a estrada ao tráfico rodado e estaban en zonas de escasa visibilidade.
Nas inmediacións localizaron dous rapaces que respondían á descrición física achegada pola persoa que denunciou os feitos e déronlles o alto, identificáronos e trasladáronos á Xefatura.