O illote de Areoso, na Illa de Arousa, foi este sábado o escenario dunha nova xornada de limpeza dos fondos mariños. Ata 53 persoas participaron nesta actividade voluntaria, organizada por Abanca e Afundación no marco do proxecto Plancton.

Durante esta xornada lográronse retirar uns 1.100 quilos de residuos que estaban depositados na contorna de Areoso. Entre os participantes atopábanse o presidente de Abanca, Juan Carlos Escotet, e o conselleiro delegado da entidade, Francisco Botas, que se sumaron ao grupo de voluntarios.

A actividade, na que participaron 12 embarcacións, iniciouse ás nove da mañá no porto de Vilanova de Arousa, desde onde partiron os distintos equipos. O grupo de voluntarios, integrado por 14 mergulladores entre navalleiros da Confraría de Pescadores da Illa de Arousa e socios do Club Subacuático Pérez-Sub, traballou durante dúas horas nas inmediacións do illote.

Os demais voluntarios foron os encargados de subir os residuos ás embarcacións, para transportalos finalmente a porto e proceder alí aos labores de clasificación e pesado.

O lixo retirado do mar foi, fundamentalmente, nasas e grandes conxuntos de redes e cabos enmarañados extraviados durante o exercicio da actividade pesqueira, así como unha serie de obxectos procedentes de terra firme.

"Foi unha experiencia moi enriquecedora compartir esta xornada cos profesionais do mar e cos outros voluntarios e poder coñecer de primeira man o esforzo que supón tratar de recuperar os nosos espazos naturais", explicou Juan Carlos Escotet.

Nesta nova xornada de voluntariado ambiental, participaron, ademais, outras entidades como o Concello da Illa de Arousa, a Federación Galega de Actividades Subacuáticas (FEGAS), Protección Civil de Vilanova de Arousa e o Servizo Marítimo da Garda Civil.

Coa acción deste sábado, son xa case tres toneladas de residuos as que se retiraron das costas e fondos mariños desde o inicio do programa Plancton no mes de abril.