Os opositores ás prazas en Educación examínanse en Pontevedra
Galicia celebra este sábado as oposicións de Educación máis descentralizadas da súa historia. A pandemia da covid-19, que o pasado ano impediu estes exames, obrigou ás autoridades educativas a multiplicar as sedes para a realización destas probas.
Aos exames, segundo os datos facilitados por Educación, presentáronse un total de 25.710 persoas que optan ás 3.894 prazas que se ofertan entre novos ingresos, catedráticos e promocións internas.
Para estas oposicións, programáronse exames en 23 localidades galegas, onde hai un total de 132 sedes distintas para albergar a todos os aspirantes.
No caso da cidade de Pontevedra habilitáronse 14 centros de exame.
Así, os aspirantes repartíronse polos colexios Xunqueira I, Xunqueira II, Daría González e Campolongo, o CIFP da Xunqueira, os institutos Xunqueira I, Xunqueira II, Valle Inclán, Luís Seoane, Torrente Ballester e Frei Martín Sarmiento, o conservatorio de música Manuel Quiroga, a EPAPU Río Lérez e a Escola Oficial de Idiomas.
En Pontevedra, realizáronse exames de ata 14 especialidades diferentes.
Foron as de educación infantil -a máis numerosa con ata seis tribunais-, educación primaria, inglés, educación física, música e educación especial, para o corpo de mestres. Bioloxía e xeoloxía, tecnoloxía, procesos sanitarios, servizos á comunidade, servizos de restauración, profesor de música e artes escénicas, trompa e idioma alemán foron, pola súa banda, as especialidades para os que optaban ás prazas en educación secundaria e FP.
Ademais, entre outros municipios, houbo opositores en dous centros de Vilagarcía, os institutos Fermín Bouza Brey e Armando Cotarelo Valledor. No seu caso, foron os que optaban ás especialidades de informática e organización e proxectos de fabricación mecánica.
Educación celebrou estas probas cun protocolo sanitario que incluía, entre outras medidas, distancia de 1,5 metros entre participantes, o uso obrigatorio de máscara, a prohibición de intercambiar material ou que só os opositores puidesen acceder ás sedes de exame.